पणजी: मोपा विमानतळ पोलिसांनी गोवा सीमेवरील पत्रादेवी तपासणी नाक्यावर प्लास्टर ऑफ पॅरिसपासून (POP) बनविलेल्या गणेशमूर्तीची बेकायदा वाहतूक करणारे एक वाहन जप्त केले. ३१ जुलै २०२५ रोजी प्राप्त झालेल्या तक्रारीच्या आधारे ही कारवाई करण्यात आली.

याप्रकरणी श्रीपाद नरेंद्र पाटील (वय २९ वर्षे, रा. जाधववाडी, जि. कोल्हापूर) या चालकाविरोधात गुन्हा दाखल करण्यात आला आहे. पाटील यांना पोलिस ठाण्यात हजर राहण्यासाठी नोटीस बजावली असून, संबंधित वाहन आणि मूर्ती जप्त केल्या आहेत. पुढील तपासणीसाठी मूर्तीचे नमुनेही घेतले आहेत.

पोलिसांनी दिलेल्या माहितीनुसार, एमएच-०९-इएम-९३६६ या क्रमांकाच्या वाहनातून एकूण ५ गणेशमूर्तीची वाहतूक केली जात होती. या मूर्ती प्लास्टर ऑफ पॅरिसपासून बनविलेल्या असल्याने वाहतूक पर्यावरण संरक्षण अधिनियम, १९८६ चे उल्लंघन असल्याचे स्पष्ट झाले आहे.

याप्रकरणी पर्यावरण संरक्षण अधिनियम, १९८६ च्या कलम १५(१) अंतर्गत गुन्हा नोंदवला असून, मोपा विमानतळ पोलिस पुढील तपास करत आहेत