फोंडा : उसगाव पंचायत सभागृहात रविवारी (ता. २८) आयोजित केलेल्या ग्रामसभेला ग्रामस्थांचा अगदी अल्प प्रतिसाद लाभला. फोंडा गटविकास अधिकाऱ्यांच्या आदेशानुसार ही ग्रामसभा घेण्यात आली. यावेळी रिव्होल्युशनरी गोवन्सच्या रोहन नाईक व नीलेश गावडे या दोन युवकांनी ग्रामसभेत महत्त्वपूर्ण ठराव मांडले.

उसगाव पंचायत क्षेत्रातील सर्व औद्योगिक आस्थापनांमध्ये उसगावातील स्थानिक युवकांना नोकरीत समावून घेत नसल्याने या पंचायत क्षेत्रात बेरोजगारी मोठ्या प्रमाणात वाढलेली आहे. संपूर्ण गोव्यातून उसगाव भागातील नेस्ले तसेच एमआरएफ कंपनीत लोक कामाला येतात; पण उसगाव येथील ग्रामस्थांना या कंपनीत रोजगार का मिळत नाही, याची दखल पंचायतीने घ्यावी व त्यांना उसगाववासीयांना नोकरीत प्रथम प्राधान्य देण्याची सक्तीची अट घालावी.

ही अट मान्य न करणाऱ्या औद्योगिक आस्थापनांचे दाखले, प्रमाणपत्रे रोखून ठेवावीत. गावातील सर्व औद्योगिक आस्थापनांकडून करवसुली महिन्याभरात करून घ्यावी. उसगाव पंचायत क्षेत्रातील औद्योगिक आस्थापनांच्या सामाजिक कल्याण फंडातून उसगावातील विविध प्रकारची सार्वजनिक विकासकामे करून घ्यावीत, असे रोहन नाईक यांनी सांगितले.

उसगाव पंचायत क्षेत्रातील सर्व भाडेकरूंचे वर्षातील पहिल्या महिन्याचे भाडेशुल्क घरमालकाला पंचायत कार्यालयात भरणा करावे लागणार आहे. यासाठी सर्वेक्षण करण्यासाठी पंचायतीतर्फे एका व्यक्तीची नियुक्ती करण्यात येणार आहे. पंचायत क्षेत्रातील विक्रेत्यांकडून सोपो गोळा करण्यासाठी लवकरच निविदा प्रसिद्ध करण्यात येणार आहे.

- नरेंद्र गावकर, सरपंच, उसगाव

उसगाव भागातील सर्व युवक-युवतीनी एकत्र येऊन या भागातील आस्थापनांत नोकरी मिळविण्यासाठी पंचायतीमध्ये होणाऱ्या ग्रामसभेत उपस्थिती लावावी व पंचायतीवर दबाव आणावा. तसे केल्यास या भागातील आस्थापनांत तुम्हाला नोकरी मिळण्याची शक्यता आहे. यासाठी सर्वांनी एकत्र येण्याची गरज आहे.

- रोहन नाईक, ‘आरजी’चे कार्यकर्ते