एकनाथ खेडेकर

Water Problem in Ponda: फोंडा व धारबांदोडा तालुक्यांत भर उन्हाळ्यात काही ठिकाणी पाण्याची गंभीर समस्या निर्माण झाली आहे. दिवसेंदिवस वाढणारी लोकवस्ती पाहता भविष्यात पाण्याचा प्रश्न अधिक गंभीर होण्याची शक्यता आहे. भविष्यातील पाण्याचा तुटवडा दूर करण्यासाठी सार्वजनिक बांधकाम खात्याने आताच तरतूद करण्याची गरज आहे.

कित्येक वर्षांपूर्वी उभारलेल्या ओपा येथील जलशुद्धीकरण प्रकल्पावर तिसवाडी व काही अंशी फोंडा तालुक्याची गरज पुरी होते. परंतु ओपा प्रकल्पाजवळच पण वरच्या बाजूला असलेल्या गावांत पाणीटंचाई जाणवते. साबांखाने काही वर्षांपासून गांजे येथे जलशुद्धीकरण प्रकल्प उभारण्यात सुरुवात केली आहे.

प्रकल्पाचे काम लवकरच पूर्ण होणार असून उसगाव, प्रियोळ येथील पाण्याची समस्या दूर होणार आहे. दूधसागर नदीच्या काठावरील गावांमध्ये साबांखाने फिल्टर बसवून पाण्याची सोय उपलब्ध करून दिली आहे. परंतु लोकवस्ती वाढल्याने भविष्यात कुळे परिसरात नवीन जलशुद्धीकरण प्रकल्प उभारण्याची गरज आहे. यासाठी स्थानिक रहिवाशांनी लोकप्रतिनिधींना साकडे घातले आहे.

धावशिरेतील टाकी विनावापर

उसगावातील लोकसंख्येतही वाढ झाली आहे. त्यामुळे येथे पाणीटंचाई जाणवते. धावशिरे-उसगाव येथील पाण्याची टाकी विनावापर पडून आहे. दोन-तीन वर्षांपूर्वी साबांखाने टाकीची दुरुस्तीही केली होती. परंतु अजूनही टाकी वापरात आली नसल्याने स्थानिकांनी नाराजी व्यक्त केली आहे.

अनेक गावांतील विहिरी आटल्या

शिरोडा परिसरातील अनेक गावांत सध्या पाणीटंचाई निर्माण झाली आहे. पाज, तोर्ल, माकाडसाय, साखरव्हाळ व अन्य गावांतील विहिरी पूर्णपणे आटल्या आहेत. त्यामुळे साबांखाने टँकरद्वारे पाणीपुरवठा सुरू केला आहे. टँकरचे पाणी साठवून ते लोकांना पुरवून वापरावे लागत आहे.

शिरोडा परिसरात पाणीटंचाई

• येथील वाढणारी लोकवस्ती पाहता कित्येक वर्षांपूर्वी घातलेल्या पाण्याच्या छोट्या वाहिन्या बदलण्याची गरज आहे. मे महिन्यात विहिरीचे पाणी आटत असल्याने लोकांची गैरसोय होत आहे.

• साबांखाकडून शिरोडा पंचायत क्षेत्रात दोन पाण्याचे टँकर पाठविण्यात येत आहेत. सध्या विहिरी आटल्या आहेत. पाऊस सुरू झाल्यानंतर विहिरींच्या पाण्याची पातळी वाढेल. त्यामुळे पाऊस सुरू होईपर्यंत पाण्याच्या टँकरवरच भिस्त असेल.

• उसगाव पंचायत क्षेत्रातील लोकांसाठी सार्वजनिक नळ उपलब्ध करून दिले आहेत. परंतु सार्वजनिक नळाच्या ठिकाणी वाहने धुतली जातात. तसेच कित्येक वेळा पाणी नळातून वाहून जात असल्याच्या स्थानिकांच्या तक्रारी आहे.