Crime News :

फोंडा, सांताक्रूझ - फोंडा येथे घर दुरुस्तीवरून मामा भाच्यात झालेल्या बाचाबाचीचे पर्यवसान भांडणात होऊन भाच्याला आपला जीव गमवावा लागला.

या भांडणात मामा कृष्णा सदाशिव नाईक (वय ६७) याने आपला भाचा अविनाश धनंजय नाईक (वय ४२) याच्या डोक्यावर दगड घालून त्याचा खून करण्याची घटना काल मध्यरात्री घडली. फोंडा पोलिसांत या प्रकरणी तक्रार दाखल केल्याने फोंडा पोलिसांनी मामाला अटक केली आहे.

पोलिसांनी दिलेल्या माहितीनुसार, सांताक्रूझ - फोंडा येथे कृष्णा नाईक याचे मातीचे घर आहे. या घरात कृष्णा व त्याची पत्नी राहते, तर या घरातील एका खोलीत कृष्णा याचा सख्खा भाचा अविनाश नाईक राहत होता.

दोन महिन्यांपूर्वी आलेल्या वादळी वाऱ्यामुळे घरातील अविनाश राहत होता तेथील पत्र्याचे छप्पर उडून गेले होते. आता पावसाळा तोंडावर आल्याने घराची भिंत भिजून घर कोसळू नये यासाठी मामाने भाच्याला पत्रे आणून घर शाकारण्यास सांगितले होते.

भाचा अविनाश नाईक हा ‘डिलिव्हरी बॉय’ म्हणून काम करत होता. सकाळी कामावर जाताना अविनाश मामाला रोज पत्रे आज आणून घालतो म्हणून सांगून घराबाहेर पडायचा, पण गेले दोन महिने या पत्र्यांचा पत्ताच नसल्याने मामा कृष्णा वैतागला होता.

काल रात्री भाचा अविनाश दारू पिऊन घरी आला आणि रिकाम्या बादलीवर त्याने लाथ मारल्याने मोठा आवाज झाला. यावेळी मामा कृष्णाने भाच्याला जाब विचारला असता त्यांच्यात कडाक्याचे भांडण झाले. यावेळी भाच्याने मामा व मामीला मारल्याने रात्री उशिरा मामा कृष्णा याने भाच्याच्या डोक्यात दगड घातला.

त्यात जखमी होऊन भाचा अविनाश मरण पावला. त्याच्या छातीवरही दगड घातल्याच्या खुणा आहेत. सकाळी हा प्रकार उघडकीस आल्यानंतर अविनाश याची सावईवेरे येथे लग्न करून दिलेली बहीण अमिता शैलेश नाईक हिने फोंडा पोलिसांना कळवल्यावर पोलिसांनी घटनास्थळी धाव घेऊन कारवाई केली. फोंडा पोलिस निरीक्षक या प्रकरणी तपास करीत आहेत.