Deepak Dhavalikar Political News

पणजी: फोंडा तालुक्यातून आपण २०२७ ची निवडणूक लढवू इच्छितो, आणि ज्या मतदारसंघात प्राबल्य आहे, त्याला आपण प्राधान्य देऊ असे म्हणालो आहे. परंतु निवडणुकीला अजून दोन वर्षे आहेत, त्यामुळे काहीजण गडबडून गेलेत, असे दिसते, असा उपरोधिक टोला मगोपचे अध्यक्ष दीपक ढवळीकर यांनी मंत्री गावडेंना लगावला.

आपल्याला कोणी एका व्यक्तीने युतीत घेतलेले नाही. भाजपच्या नेतृत्वाने आम्हाला युतीत घेतले आहे, हे आमच्यावर नाहक आरोप करणाऱ्यांनी लक्षात घ्यावे, असेही ते म्हणाले.

दोन दिवसांपूर्वी कारण एका मुलाखतीत ढवळीकर यांनी आपली इच्छा बोलून दाखविली होती. त्यावर मंत्री गावडे यांनी जे राजकारणी आपण फोंड्यात कुठेही उभे राहून निवडून येऊ शकतो असे सांगत आहेत, त्यांना अगोदर भाजपशी असलेली युती तोडावी, अशी टीका केली होती.

त्याला आता ढवळीकर यांनी कानपिचक्या दिल्या आहेत. ‘गोमन्तक' शी बोलताना ढवळीकर म्हणाले, घटनेनुसार सर्वांना मते मांडण्याचा अधिकार आहे आणि कोणी कोठेही निवडणूक लढवू शकतो. त्याशिवाय राज्यात मगोप आणि भाजप एकत्रित २०२७ च्या निवडणूक लढल्यास गोव्यात पुन्हा एकहाती सत्ता येईल, आमदार आयात करावे लागणार नाहीत,असेही आपण सांगितले होते.

पत्रकारांनी आपणास निवडणूक लढविण्याविषयी विचारलेल्या प्रश्नावर वरीलप्रमाणे आपण इच्छा व्यक्त केली. परंतु त्यावर कोण डगमगू लागल्यास त्याला आपण काय करणार, असेही दीपक ढवळीकर म्हणाले.