Politics: मगो पक्ष सत्तेवर आल्यास प्रत्येक घरातील महिला प्रमुखाला मासिक पाच हजार रुपये देण्याबरोबरच कंत्राटी कामगार तसेच अर्धवेळ कामावर असलेल्या शिक्षकांना (Teacher) सेवेत कायम करण्याचे अभिवचन मगो पक्षातर्फे आमदार सुदिन ढवळीकर यांनी दिले.

फोंड्यात विठोबा देवस्थान सभागृहात मगो पक्षाचा (MGP) फोंड्यातील कार्यकर्त्यांसाठी मार्गदर्शन मेळावा आयोजित करण्यात आला होता, त्यावेळेला सुदिन ढवळीकर यांनी भाजपवर (BJP) कडाडून टीका केली. यावेळी सुदिन ढवळीकर यांच्यासमवेत फोंड्यातील मगोचे नेते डॉ. केतन भाटीकर, मगो केंद्रीय कार्यकारिणी सदस्य अनंत नाईक, अनील नाईक आदी उपस्थित होते.

सुदिन ढवळीकर म्हणाले की, मगो आणि तृणमूल काँग्रेसचे (TMC) युती सरकार राज्यात सत्तेवर आले तर कुटुंब चालवण्यासाठी प्रत्येक घरातील महिला प्रमुखाला महिना पाच हजार रुपये देण्यात येतील. त्यासाठीची कार्ड योजना आताच राबवण्यात येणार आहे. मगो आणि तृणमूलच्या युतीसाठी भाजपकडून अभद्र युती असे संबोधले जात असल्याने ज्या वेळेला केंद्रात तृणमूलच्या ममता बॅनर्जी व अटलबिहारी वाजपेयी यांची युती होती, त्यावेळेला ही युती अभद्र नव्हती काय, असा सवाल करून स्वतःच्या स्वार्थासाठी इतरांचे आमदार पळवणाऱ्या भाजपने स्वतःच्या पायाखाली काय जळते आहे ते आधी पहावे असे सल्ला दिला. भाटीकर म्हणाले, निष्ठावंत कार्यकर्ते हीच मगोची ताकद आहे.