पणजी: बलात्कारप्रकरणातील पीडितेने संशयिताविरुद्ध जबानी फिरवल्याने पोक्सो न्यायालयाने आयआरबी पोलिस असलेल्या संशयित प्रितम कदम याची निर्दोष मुक्तता केली. न्यायालयासमोर असलेल्या दस्तावेजानुसार पीडित व संशयित यांचे संबंध होते. पीडितेने संशयिताबरोबर विवाह केल्याचा कोणताच पुरावा नाही. त्यामुळे संशयाचा फायदा देऊन त्याला निर्दोष ठरवण्यात येत असल्याचे निरीक्षण न्यायालयाने केले आहे.

संशयित प्रितम कदम हा विवाहित असताना त्याने पीडितेशी सावंतवाडी येथे जाऊन विवाह केला व त्यानंतर लैंगिक अत्याचार केल्याची तक्रार पोलिसांत दाखल झाली होती. पीडित तरुणी ही समुद्रकिनाऱ्यावर वस्तू विकायची तर पोलिस कॉन्स्टेबल असलेला संशयित तेथील समुद्रकिनाऱ्यावर ड्युटीला होता. २०१३ पासून ते दोघे एकमेकाला ओळखत होते. याप्रकरणी पोलिसानी संशयिताला ४ जून २०१६ रोजी अटक करून गुन्हा दाखल केला होता.

त्याने पीडितेला त्याचा विवाह झाला असल्याचे न सांगता तिची फसवणूक केली. मात्र पीडितेने न्यायालयात दिलेल्या जबानीत संशयिताविरुद्ध कोणतेच आरोप केले नाहीत. तिने ही तक्रार का दाखल केली, याचे कारणही दिलेले नाही. तिला हे प्रकरण पुढे न्यायचे नाही. हे प्रकरण मागे घेण्यासाठी कोणाकडूनच आपल्यावर दबाव आणला गेला नाही, असे न्यायालयातील सुनावणीवेळी स्पष्ट केले होते.

विवाहाचा पुरावाच नाही!

संशयिताने पीडित तरुणीबरोबर विवाह करून तो भाड्याच्या खोलीत राहत असल्याचा पुरावाही सिद्ध झालेला नाही. त्याने विवाह केल्याचा विवाहनोंदणी प्रमाणपत्र पोलिसांना सापडले नाही. तिची न्यायदंडाधिकाऱ्यांसमोर जबानी नोंदवण्यात आली होती, मात्र त्यातही तिने संशयिताविरुद्ध आरोप केलेले नाहीत.