Bangladeshi in Goa : ‘पीएफआय’वरील बंदीनंतर बार्देशातील कळंगुट, हणजूण तसेच अन्‍य भागांतील पोलिस यंत्रणा सतर्क झाली आहे. या परिसरात वास्तव्य करून राहणाऱ्या बांगलादेशी लोकांची कसून चौकशी करण्यात येत आहे. दरम्‍यान, बागा येथून परवीन बेगम (40) व मोहम्मद अल अमीन (18) यांना ताब्यात घेण्यात आल्याची माहिती पोलिस निरीक्षक दत्तगुरु सावंत यांनी दिली.

कळंगुट पोलिस कक्षेत येणारा सिकेरीपासून बागा तर हणजूण पोलिस हद्दीत येणाऱ्या हणजूण, वागातोर तसेच शापोरा मच्छीमार जेटीपर्यंतचा परिसर पोलिसांनी बुधवारी विशेष पथकाच्या मदतीने दिवसभर पिंजून काढला. सोमवारपासून सुरू झालेल्या या कारवाईत अद्याप कुणालाच कायदेशीर अटक करण्यात आलेली नाही, असे हणजूणचे पोलिस निरीक्षक प्रशाल देसाई व कळंगुटचे पोलिस निरीक्षक दत्तगुरु सावंत यांनी सांगितले.

शाळांनी जारी केला महत्त्‍वपूर्ण आदेश

मुलांना पळविणारी टोळी सक्रिय झाल्याच्या वृत्ताने कळंगुट तसेच शिवोली मतदारसंघातील बहुतांक शाळांनी खबरदारीचा उपाय म्हणून शाळा सुटल्यावर मुलांना पालकांशिवाय अन्य नातेवाईकांच्या स्वाधीन करण्यास मनाई करण्याचा आदेश जारी केला आहे. बालरथमधून प्रवास करणाऱ्या विद्यार्थ्यांसाठीही त्‍यांना घरी सोडतेवेळी विशेष नियमावली जारी करण्यात आल्याची माहिती सूत्रांनी दिली. काही संशयास्‍पद हालचाली आढळल्‍यास त्वरित जवळच्या पोलिस स्थानकाशी संपर्क साधावा, असे आवाहन करण्‍यात आले आहे.