देशातील रोजगाराची पातळी वाढवण्याचा प्रयत्न म्हणून केंद्र सरकार देशाच्या अनेक भागात रोजगार मेळाव्याचे आयोजन करते. या पार्श्वभूमीवर उद्या दिनांक 24 नोव्हेंबर रोजी गोवा राजभवन येथे रोजगार मेळावा आयोजित करण्यात आला आहे. या कार्यक्रमास पंतप्रधान नरेंद्र मोदी संबोधित करतील तसेच 1,250 युवकांना यावेळी नियुक्तीपत्रे सुपुर्त करण्यात येणार आहेत. अशी माहिती राज्याचे मुख्यमंत्री प्रमोद सावंत यांनी दिली.

(PM Modi to address Rozgar Mela gathering in Goa on 24 Nov)

मिळालेल्या माहितीनुसार 24 नोव्हेंबर रोजी सकाळी 10.30 वाजता गोवा राजभवन दरबार हॉलमध्ये रोजगार मेळावा कार्यक्रमाचे आयोजन करण्यात आले आहे. या कार्यक्रमाला पंतप्रधान नरेंद्र मोदी संबोधित करत पोलीस विभाग, अग्निशमन आणि आपत्कालीन सेवा, नियोजन आणि सांख्यिकी आणि कृषी विभागांमध्ये निवड झालेल्या व्यक्तींना नियुक्तीपत्रे सुपुर्द करणार आहेत.

पंतप्रधान नरेंद्र मोदी यांनी दोन दिवसांपुर्वीच व्हिडिओ कॉन्फरन्सिंगद्वारे देशभरातील सुमारे 71,000 हून अधिक युवकांना नोकरीची नियुक्ती पत्रे दिली आहेत. यावेळी पंतप्रधांनी गोव्याचा उल्लेख करताना "दुहेरी इंजिन असलेल्या सरकारचा हा दुहेरी फायदा आहे. त्यामुळे तरुणांना नियुक्तीपत्रे देण्याची मोहीम सतत सुरू राहील," असे पंतप्रधानांनी म्हटले आहे.