जंगल भागात फळझाडांची मोठ्या प्रमाणात लागवड केली तर पर्यावरणाचे संतुलन अबाधित राहील, असे प्रतिपादन पर्ये मतदारसंघाच्या आमदार तथा वन महामंडळाच्या अध्यक्ष आमदार डाॅ. दिव्या राणे यांनी केले.

भाजपतर्फे राबविलेल्या ‘एक पेड माॅं के नाम’ या संकल्पनेखाली पर्ये मतदारसंघातील ठाणे व म्हाऊस पंचायतींसाठी आयोजित केलेल्या वृक्षारोपण कार्यक्रमात त्या बोलत होत्या. हा कार्यक्रम ठाणे पंचायत क्षेत्रातील नानेली येथील वन क्षेत्रात झाला.

यावेळी समाजसेवक विनोद शिंदे, म्हाऊस सरपंच सोमनाथ काळे, ठाणे सरपंच नीलेश परवार, उपसरपंच तनया गावकर, पंच सरिता गावकर, सुभाष गावडे, सुचिता गावकर, अनुष्का गावस, सुरेश आयकर, म्हाऊस उपसरपंच राधिकी सावंत, गुरुदास गावस, सुलभा देसाई, प्रीती गावकर, महेश गावकर, वन खात्याचे अधिकारी श्‍यामसुंदर गावस तसेच इतरांची उपस्थिती होती.

यावेळी विनोद शिंदे यांनीही विचार व्यक्त केले. यावेळी आमदार डाॅ. दिव्या राणे यांच्या हस्ते विविध फळझाडांची लागवड करण्यात आली. सरपंच सोमनाथ काळे यांनी स्वागत केले, तर सरपंच नीलेश परवार यांनी आभार मानले. यावेळी स्थानिक ग्रामस्थ आणि पंचायत मंडळाचे पदाधिकारी मोठ्या संख्येने उपस्थित होते.