सासष्टी: राज्यात अननसाची लागवड सुरू झाली आहे. कुंकळये (मंगेशी), सावईवेरे, रिवण, केपे, सांगेसारख्या भागात अननसाचे घेतले जाते व आता हे पीक गोव्यातील इतर भागातील शेतकऱ्यांमध्ये रुची निर्माण करत आहे.

एका आकडेवारीप्रमाणे गोव्यात दरवर्षी ३३६ हेक्टर जमिनीत ५०४० टन अननसाचे उत्पादन घेतले जाते. अननसाचे तीन प्रकार जास्त प्रचलित आहेत. त्यात जायंट कीव, क्वीन व रेड स्पॅनिश या प्रकारांचा समावेश आहे. या तिन्ही प्रकारांची लागवड गोव्यात होते, हे गोव्याचे भाग्यच म्हणावे लागेल.

कारण अननसाच्या पिकाला जे हवामान, माती हवी असते ती गोव्यात उपलब्ध आहे. पण जायंट कीव अननस जास्त रसाळ असतो. त्याचा गोडवा वेगळाच असतो. त्याचा आकारही मोठा असतो. क्वीन व रेड स्पॅनिश या प्रकारांमध्ये जास्त रस नसतो.

इतर देशांमध्ये डबाबंद (कॅनिंग) उत्पादनांसाठी अननसाचा जवळजवळ ९५ टक्के वापर होतो तर केवळ ५ टक्के खाण्यासाठी वापरतात. पण भारतातील स्थिती याच्या अगदी उलट आहे.

तरी आता हळूहळू भारतात व गोव्यात अननसाचा वापर डबाबंद उत्पादनांसाठी होणे सुरू झाले आहे, असे चार वर्षांपूर्वी केपे येथे अननसाची लागवड सुरू केलेल्या बाणावली येथील समीर अवदी यांनी सांगितले. त्यांनी सांगितले की, अननसाचा वापर जॅम, ज्यूस, चंग्स (शिरा, केकला वापरतात) यांच्या उत्पादनासाठी होत असतो.

दरम्यान, सांगे येथील कृषी अधिकारी अग्रेश शिरोडकर यांनी सांगितले की, अननसाच्या उत्पादनासाठी प्रतिहेक्टर १.२० लाख रुपयांपर्यंत अनुदान मिळू शकते. त्याचप्रमाणे एक हजार चौरस मीटर जागेतील ४,५०० सकर्स लागवडीला ४८ हजार रुपये अनुदान मिळू शकते.