डिचोली : पावसाच्या जोरदार तडाख्यात पिळगाव पंचायत क्षेत्रातील माठवाडा येथे एका गरीब विधवा महिलेच्या घरावर भलामोठा आम्रवृक्ष कोसळून घराचे मोठे नुकसान झाले. मंगळवारी मध्यरात्री घडलेल्या या घटनेत सुदैवाने जीवितहानी टळली. मात्र, घराची मोठ्या प्रमाणात पडझड झाल्याने भर पावसाळ्यात संबंधित महिलेवर बेघर होण्याची वेळ आली आहे.

पुजिता पुंडलिक कवळेकर यांच्या घरावर घरालगत असलेला जीर्ण आम्रवृक्ष कोसळल्याने घराचा मोठा भाग उद्ध्वस्त झाला. घरातील साहित्य तसेच घरासमोर उभी असलेली त्यांच्या दिवंगत पतीची दुचाकीही नुकसानग्रस्त झाली. या दुर्घटनेत एक लाख रुपयांहून अधिक किमतीच्या मालमत्तेची हानी झाल्याचा अंदाज व्यक्त करण्यात येत आहे.

घटना घडली त्यावेळी पुजिता कवळेकर या संभाव्य धोक्याची जाणीव झाल्याने शेजारी राहणाऱ्या जाऊबाईंच्या घरी झोपण्यासाठी गेल्या होत्या. त्यामुळे मोठा अनर्थ टळला. ‘‘झाड कधीही कोसळू शकते, अशी भीती वाटत होती.

देवाच्या कृपेने मी वाचले,’’ अशी भावना त्यांनी व्यक्त केली.

कोसळलेला वृक्ष वीजवाहिन्यांवर पडल्याने वीजतारा तुटल्या तसेच दोन वीजखांबही जमीनदोस्त झाले. त्यामुळे माठवाडा परिसरातील वीजपुरवठा खंडित झाला. वीज खात्याचेही मोठे नुकसान झाले.

सहकार्याचे आश्‍वासन!

या घटनेची माहिती मिळताच मयेचे आमदार प्रेमेंद्र शेट यांनी घटनास्थळी भेट देऊन नुकसानीची पाहणी केली. त्यांनी पुजिता कवळेकर यांना धीर देत आर्थिक मदतीबरोबरच घर दुरुस्तीसाठी आवश्यक सहकार्य करण्याचे आश्वासन दिले. यावेळी पिळगावचे पंचसदस्य आणि स्थानिक नागरिक उपस्थित होते. अचानक ओढवलेल्या या संकटामुळे पुजिता कवळेकर यांना सध्या शेजाऱ्यांच्या घरी आश्रय घ्यावा लागत असून, भर पावसाळ्यात त्यांच्या निवाऱ्याचा प्रश्न ऐरणीवर आला आहे.