Canacona Police: काणकोण पोलिस स्टेशनमधील पोलिस कर्मचाऱ्यांनी 62 हजार 500 रूपयांचा निधी श्रमधाम या योजनेसाठी दिला आहे. या रकमेचा धनादेश विधानसभेचे सभापती आणि काणकोणचे आमदार रमेश तवडकर यांच्याकडे सुपूर्द करण्यात आला.

श्रमधाम ही रमेश तवडकर यांची संकल्पना आहे. यातून निराधार नागरिकांना नवीन घर बांधून दिले जाते. गेल्याच महिन्यात 15 जून रोजी लोकसभेचे अध्यक्ष ओम बिर्ला यांच्या हस्ते श्रम-धाम योजनेतील वीस घरांचे हस्तांतरण करण्यात आले होते.

श्रम-धाम योजनेच्या सचित्र माहिती पुस्तकाचे प्रकाशनही यावेळी झाले होते. पुस्तकात सर्व वीसही घरांची व घरमालकांची माहिती आहे. त्यांचा पूर्वीचा निवारा, त्यानंतर घराची बांधणी व पूर्ण घराची बांधणी झालेले फोटो आहेत.

मार्च महिन्यात या योजनेला सुरवात झाली होती. राज्यातील प्रत्येक व्यक्तीने एक रुपया किंवा एक दिवस या उपक्रमासाठी देण्याचे आवाहन तवडकर यांनी केले होते.

त्यानंतर राज्यभरातून आर्थिक मदत त्याचबरोबर श्रम करण्यासाठी कार्यकर्ते शनिवार, रविवार व सुट्टीच्या दिवसांत काणकोणात राबले होते. आगामी दोन ते तीन वर्षांत काणकोण मतदारसंघात या योजनेतून दीडशे घरे उभारण्याचा तवडकर यांचा मानस आहे.