मोरजी, सतत पडत असलेल्या जोरदार पावसामुळे शेतीला नदीचे स्वरूप प्राप्त झाले आहे. पाणी जायला मार्गही मोकळे नसल्याने शेती कुजून गेली आहे. त्यामुळे पुन्हा एकदा शेतकऱ्यांना लावणी करावी लागणार आहे.

पेडणे तालुक्यातील धारगळ, मोरजी, मांद्रे, आगरवाडा, तुये, कोरगाव येथील शेतीत मोठ्या प्रमाणात पाणी साचून राहिल्यामुळे शेती कुजून गेली आहे. त्यामुळे पुन्हा एकदा शेतकऱ्यांना नव्या पद्धतीने पेरणी किंवा लावणी करावी लागेल. कृषी खात्याने याकडे लक्ष देऊन शेतकऱ्यांना झालेली नुकसान भरपाई देण्यासाठी उपाययोजना करावी, अशी मागणी शेतकऱ्यांनी केली आहे.

दरम्‍यान, केंद्र आणि राज्य सरकारच्या कृषी विभागाकडून शेतकऱ्यांसाठी विविध योजना आहेत.

वाढत्‍या बांधकामांमुळे चिंता वाढली

शेतात मोठ्या प्रमाणात पाणी साचण्याची मुख्य कारणे अनेक आहेत. शेतीत पाणी जाण्याच्या वाटा बंद झालेल्‍या आहेत.

ठिकठिकाणी काही प्रमाणात मातीचे भराव टाकून बांधकाम, इमारती उभारल्‍याने पाणी शेतीतच साचून राहते. त्‍यासाठी स्थानिक पंचायतीने पुढाकार घेऊन शेतीतील पाणी जाण्याचे पूर्वीचे मार्ग मोकळे करणे गरजेचे आहे.