Bihari Man arrested for stealing bag from Morjim Beach: मोरजी येथे बीचवर काही मित्र त्यांचे महागडे साहित्य बॅगमध्ये ठेऊन समुद्रात पोहायला गेले. या दरम्यान, त्यांच्या साहित्याची चोरी झाली. 28 मे रोजी ही घटना त्यानंतर पंधरा दिवसांनी पेडणे पोलिसांनी बिहारचा रहिवाशी असलेल्या आरोपीला अटक केली आहे. पेडणे पोलिसांनी प्रसिद्ध पत्रकाद्वारे याबाबत माहिती दिली आहे.

पोलिसांनी गुलबार खुर्शिद (वय 19, रा. बिहार) याला अटक केली आहे. त्याच्याकडून चोरीचा आयफोन 11 प्रो 2, आयफोन 12, सॅमसंग S22 अल्ट्रा फोन, सॅमसंग फ्लिप 4 आणि एक स्कॉट कंपनीचा गॉगल असे एकूण 3 लाख 50 हजार रूपये चोरीचे साहित्य जप्त केले आहे.

तक्रारदार पर्यटकाच्या तक्रारीनंतर पेडणे पोलिसांनी भारतीय दंड संहिता कलम 379 अंतर्गत गुन्हा दाखल केला आहे.

पेडणे पोलिसांनी दिलेल्या माहितीनुसार, एक तरूण मोरजी चर्च येथे मोबाईल विक्री करत असल्याची माहिती पोलिसांना मिळाली. पोलिसांनी एक टीम तयार करत संशयित आरोपी गुलबार याला अटक केली. त्याच्याकडून 3.5 लाख किंमतीचे साहित्य असलेली बॅग जप्त करण्यात आली आहे.