पणजी: पार्से-पेडणे येथील एका डेअरीमध्ये सहकाऱ्याचा खून करून पुरावा नष्ट केल्याचा आरोप असलेल्या अनिल झाटे याला मुंबई उच्च न्यायालयाच्या गोवा खंडपीठाने सशर्त जामीन मंजूर केला आहे. आरोपी गेल्या चार वर्षांहून अधिक काळ कोठडीत असून खटला लवकर संपण्याची शक्यता नसल्याचे निरीक्षण नोंदवत न्यायमूर्ती डॉ. नीला गोखले यांनी हा आदेश दिला.

३० जानेवारी २०२२ रोजी पेडणे पोलिस स्थानकात याप्रकरणी गुन्हा नोंदवण्यात आला होता. पार्से येथील एका डेअरीमध्ये काम करणाऱ्या संतोष नामक व्यक्तीचा खून केल्याचा आरोप झाटे याच्यावर आहे. पीडिताचे डोके भिंतीवर तसेच टणक वस्तूवर आपटून त्याची हत्या करण्यात

आली. त्यानंतर पुरावा नष्ट करण्याच्या उद्देशाने मृतदेह विहिरीत फेकून दिल्याचा पोलिसांचा दावा आहे. या प्रकरणी पोलिसांनी भारतीय दंड संहिता कलम ४४७, ३०२ आणि २०१ अंतर्गत गुन्हा नोंदवला आहे.

एकूण ४४ साक्षीदार

जामिनाला विरोध करताना सरकारी वकिलांनी तांत्रिक पुरावे तसेच आरोपीची गुन्हेगारी पार्श्वभूमी न्यायालयासमोर मांडली. मात्र, न्यायालयाने नमूद केले की हा खटला पूर्णतः परिस्थितीजन्य पुराव्यांवर आधारित आहे. प्रकरणात एकूण ४४ साक्षीदार असून, आतापर्यंत केवळ दोनच साक्षीदारांची साक्ष पूर्ण झाली आहे. त्यामुळे नजीकच्या भविष्यात खटला संपण्याची शक्यता नसल्याचे न्यायालयाने स्पष्ट केले.