पेडणे: मालपे येथे राष्ट्रीय महामार्गावर चोरी करण्याच्या उद्देशाने टॅक्सी चालकावर हल्ला करून पसार गेलेल्या पारधी गॅंगमधील तिघा संशयितांना पेडणे पोलिसांनी मंगळवारी संध्याकाळी सावंतवाडी पोलिसांकडून ताब्यात घेण्यात आले.

शंकर मधुकर पवार ऊर्फ हाड्या (२४), राजू मधुकर पवार ऊर्फ गुडिया (२३) हे दोघेही सखे भाऊ असून ते सारोळे मोहाल-सोलापूर येथील तर अजय सुनील भोसले (२७) धाणेगाव, तुळजापूर, धाराशिव, महाराष्ट्र अशी संशयितांची नावे आहेत.

१० जुलै रोजी रात्री कळंगुट ते बांद्यापर्यंत भाड्याने टॅक्सी पाहिजे असल्याचा बहाणा करून संजीवन कृष्णा वेंगुर्लेकर यांची टॅक्सी भाड्याने घेतली. रात्री ९ च्या दरम्यान मालपे-न्हईबाग येथील राष्ट्रीय महामार्ग महामार्गावर सामसूम असलेल्या ठिकाणी टॅक्सी थांबवण्यास सांगून संशयितांनी चालक वेंगुर्लेकर याला टॅक्सीतून ओढून बाहेर काढले व धारदार शस्त्रांनी प्राणघातक हल्ला करून पसार झाले. या हल्ल्यात वेंगुर्लेकर गंभीर जखमी झाले होते.

दरम्यान, पेडणे पोलिसांनी याप्रकरणी एका अल्पवयीन संशयिताला ताब्यात घेतले. त्याच्याकडून मिळालेल्या माहितीवरून पेडणे पोलिस शोध घेत सावंतवाडी येथे पोहोचले. मात्र सर्वत्र शोध घेऊनही संशयित सापडू शकले नव्हते.

अल्पवयीन संशयिताकडून मिळालेली अन्य संशयितांची नावे व फोटो पेडणे पोलिसांनी सावंतवाडी पोलिसांना दिले होते. त्यानुसार सावंतवाडी पोलिसांनी शोध घेऊन संशयितांना ताब्यात घेतले व पेडणे पोलिसांच्या हवाली केले. पेडणेचे पोलिस निरीक्षक सचिन लोकरे यांच्या मार्गदर्शनाखाली पुढील सुरू आहे.