पेडणे: पहिले मुख्यमंत्री भाऊसाहेब बांदोडकरांनी आणलेला ‘कसेल त्याची जमीन व राहील त्याचे घर’ याबाबत मगो पक्षाची जी भूमिका होती, ती रास्त होती. त्यामुळे अनेकांना आधार वाटत होता. मात्र हा कायदा त्यानंतर आलेल्या सगळ्या सरकारांनी बदलला.

बदललेला कायदा गोव्याच्या जनतेला व शेतकऱ्यांना देशोधडीला लावणारा असून मुख्यमंत्री डॉ. प्रमोद सावंत यांनी तो कायदा बदलून शेतकऱ्यांना दिलासा द्यावा, अशी मागणी गोवा कुळ मुंडकार संघर्ष समितीचे समन्वयक दीपेश नाईक यांनी पेडणे येथे केली.

गोव्यातील शेतकऱ्यांचा कसण्याचा दिवस म्हणून ८ ऑक्टोबर हा गोवा कुळ मुंडकार संघर्ष समितीच्या वतीने पाळण्यात येतो. यानिमित्त पेडणे नगरपालिकेच्या महात्मा गांधी उद्यानात आयोजित धरणे आंदोलनात ते बोलत होते. यावेळी हरमलचे माजी सरपंच डॅनियल डिसोझा, संतोष मांद्रेकर व शेतकरी उपस्थित होते

पुढे बोलताना नाईक म्हणाले की ,भाऊसाहेब बांदोडकर आणि आणलेला हा कायदा त्यांची राजवट गेल्यानंतर दुसऱ्या सरकारने बदलला आणि त्यामुळे गोव्यातील कष्टकरी शेतकरी यांचे मोठ्या प्रमाणात नुकसान झाले. याबाबत आम्ही वेळोवेळी आवाज उठवत आहोत. ८ ऑक्टोबर या दिवशी ‘कसेल त्याची जमीन आणि राहील त्याचं घर’ हा कायदा अंमलात आला तेव्हापासून हा दिवस ‘कसविणाऱ्यांचा दिवस’ म्हणून पाळला जातो.

स्व. भाऊसाहेब बांदोडकर यांनी आणि त्याच्या पक्षाने मोठ्या प्रमाणात शेतकऱ्यांना दिलासा दिला होता. मात्र, त्यानंतर आणि खास करून मुख्यमंत्री मनोहर पर्रीकर यांनी भाजप सरकारच्या काळात कायद्यात बदल केले. नवीन बदललेला कायदा हा गोव्याच्या जनतेसाठी आणि गोव्याच्या शेतकऱ्यांसाठी देशोधडीला लावणारा कायदा असून त्यात बदल करणे आवश्यक आहे.

अन्यथा परिणाम भोगावे लागतील!

संतोष मांद्रेकर म्हणाले की भाऊसाहेबांनी कुळ, मुंडकारासाठी जो कायदा केला होता तो त्यानंतरच्या सरकारने बदलून केलेला कुळ आणि मुंडकाराच्या विरोधी कायदा आहे. आगामी विधानसभा निवडणुकीपूर्वी सरकार नेत्यात बदल करावा, अन्यथा त्याचे परिणाम सरकारला भोगावे लागतील, असा इशारा त्यांनी यावेळी दिला.