Goa Destination Wedding: पेडणे तालुक्यातील मोरजी, आश्वे-मांद्रे आणि हरमल व केरी-तेरेखोल या किनारी भागात पर्यटन हंगामात मोठ्या प्रमाणात आर्थिक उलाढाल होत आहे. हा हंगाम जर पूर्णपणे एप्रिलपर्यंत सुरळीत चालला तर मागच्या दोन वर्षांतील नुकसान भरून येणार असल्याची माहिती व्यावसायिक देत आहेत.

पर्यटन हंगाम म्हटल्यानंतर किनारी भागात किमान 5,000 पेक्षा जास्त रोजगाराच्या संधी उपलब्ध होतात. त्याचप्रमाणे पर्यटनाचा व्यवसाय वाढीस लावण्यासाठी विविध आस्थापने त्यात भाजी, बेकरी, दूध, मासे, सुपर मार्केट, मनी एक्स्चेंज, टेलिफोन, प्रवासी वाहने, कपडे अशा विविध व्यावसायिकांना या पर्यटन हंगामाचा लाभ होत असतो.

पर्यटन हंगाम म्हटला की संगीत रजनी, पार्ट्या, ध्वनिप्रदूषण, चोऱ्या-माऱ्या असे प्रकार वारंवार घडतात. एखादी संगीत रजनी पार्टी आयोजित केली तर अनेकांची मर्जी राखावी लागते. मग परवाना असो किंवा नसो.

मांद्रे मतदारसंघातील काही रेस्टॉरंट आता देशी आणि विदेशी पर्यटकांचे लग्नसोहळे आयोजित करण्यावर भर देत आहेत. किनारी भागातील मोजक्याच हॉटेल्सवर असे सोहळे आयोजित केले जातात. आज-काल टॅक्सी व्यावसायिक जे पर्यटक घेऊन हॉटेलवर येतात त्यांनाही एखाद्यावेळी गिफ्ट ऑफर दिली तर ते दुसऱ्या वेळी ग्राहक आणतात.

आवश्‍यक सुविधांची वानवा

विदेशातील उच्च दर्जाचे पर्यटक यायला हवे तर तशा सुविधा राज्यात आणि किनारी भागात उपलब्ध व्हायला हव्यात. येणाऱ्या पर्यटकांना किनारी भागात आवश्‍यक सोयीसुविधा पुरवल्या जात नाहीत.

असा असतो लग्नसोहळ्यांचा थाट...

• सर्व नियम पाळून किनारी भागात लग्न सोहळे.

• केवळ नातेवाईक व निमंत्रित पाहुण्यांची उपस्थिती.

• किनारी भागातील आकर्षक रेस्टॉरंटमध्ये आयोजन.

• लग्नसोहळ्यात आकर्षक सजावट व विद्युत रोषणाई.

• सायंकाळी सूर्यास्तानंतर शांत वातावरणात कार्यक्रम.

• भारतीय संगीताच्या मैफली. जेवणाची सोय.

हरी म्हामल, ‘लाकबाना रिसॉर्ट’चे व्यवस्थापक-

यंदा किनारी भागातील पर्यटन हंगाम फायदेशीर आहे. कोरोनाचा संसर्ग न होता हा हंगाम पुढेही सुरळीत झाला तर गेल्या दोन वर्षांचा आर्थिक तोटा भरून होईल.

प्रमेश मयेकर, व्यावसायिक-

यंदा मोठ्या प्रमाणात देशी आणि विदेशी पर्यटक किनारी भागाबरोबरच ग्रामीण भागात वास्तव्य करत आहेत. यंदा पर्यटनात ज्यांनी आर्थिक गुंतवणूक केली त्यांना लाभ होऊ शकतो. कोरोनाचा संसर्ग वाढू नये, अशी प्रार्थना आहे.