CM Pramod Sawant : गेल्या काही दिवसांपासून राज्यात गुन्हेगारी विश्‍वाने डोके वर काढले आहे. विनयभंग, चोरी, गोळीबार, बलात्कार, खून आणि अमली पदार्थांचा सुळसुळाट यासारख्या घटनांमुळे सामाजिक अंतरंगात अस्वस्थता निर्माण झाली आहे. तर विरोधकांनीही या मुद्द्यावरून सरकारला धारेवर धरले आहे. दुसरीकडे मुख्यमंत्री प्रमोद सावंत यांनी राज्यातील कायदा व सुव्यवस्था सुरळीत असून गेल्या काही दिवसांपासून घडलेल्या घटनांमधून राज्याबाहेर लोक सहभागी असल्याचे सांगितले आहे.

राज्यात वाढत्या गुन्हेगारीवर मुख्यमंत्र्यांनी जरी असं स्पष्टीकरण दिलं असलं तरीही सध्या चांगलच गाजत असलेल्या सोनाली फोगट आणि अवैध वाळू उपसा प्रकरणातील आरोपींमध्ये गोव्यातील लोकच सहभागी असल्यानं मुख्यमंत्री केवळ बचावासाठी सावध प्रतिक्रिया देत असल्याचंही बोललं जात आहे.

राज्यात गुन्हेगारी फोफावली आहे. अल्पवयीन मुलींचा विनयभंग आणि बलात्कार, कुडचडेत वाळू माफियांमधील अंतर्गत वादातून कामगाराचा खून, चोऱ्या, सोमवारी तर बायणा वास्को येथे दिवसाढवळ्या चौघांनी तरुणाची निर्घृण हत्या केली. या प्रकरणांमुळे सामाजिक क्षेत्रामधून चिंता व्यक्त होत आहे. तर विरोधकांनीही राज्य सरकारवर आगपाखड सुरू केली आहे.

गोवा फॉरवर्डचे आमदार विजय सरदेसाई यांनी गुन्हेगारीला सरकार जबाबदार असल्याचा आरोप केला. आम आदमी पक्षानेही सरकारच्या निष्क्रियतेमुळेच गुन्हेगारी फोफावत असल्याची टीका केली. वाढत्या गुन्हेगारी प्रकरणांमुळे राज्यातील जनता सुरक्षित नाही, असे सांगत गोवा खासगी बसमालक संघटनेचे सरचिटणीस सुदीप ताम्हणकर यांनी संताप व्यक्त केला. यावर मुख्यमंत्र्यांनी विरोधकांचे आरोप फेटाळत राज्यातील गुन्हेगारी नियंत्रणात असल्याचा दावा केला.