Goa Police : ड्रग्स हा गोव्याला पोखरणारा रोग असून त्याचा मुळापासून नायनाट करणे पोलिसांना सहज शक्य आहे. मात्र त्‍यांच्‍याकडून केवळ दिखाऊपणा केला जातो. ड्रग्सची पाळेमुळे खेड्या पाड्यात पोहोचली असून ती उखडून टाकणे आज गरजेचे बनले आहे. लहान लहान मुले आज ड्रग्सच्या आहारी जात आहेत.

ड्रग्स विकत घेणारे आणि विकणाऱ्यांची टोळी गावागावात कुठे सक्रिय असते याची माहिती सर्वसामान्य लोकांना असते, पण स्थानिक पोलिसांना कशी नसते? असा खोचक सवाल उपस्‍थित करण्‍यात येत आहे. अशा प्रकारांमुळे ड्रग्सची विक्री करणाऱ्यांचे आयतेच फावते. आज ड्रग्स घेणे ही फॅशन झाली आहे. प्रत्येक आडोशाला टोळके असतेच. यावर पोलिसांची करडी नजर असणे आवश्यक आहे.

अन्‍यथा अगोदरच हाताबहेर गेलेली युवापिढी आणखी बरबाद होईल. ड्रग्सच्‍या आहारी गेलेला माणूस कित्‍येकदा माणुसकी विसरतो. खरं म्हणजे ड्रग्स व्यवसायात सापडलेल्यांना कोणतीही सवलत न देता समूळ बिमोड करण्यासाठी पोलिसांनी अधिक सक्रिय होण्याची गरज व्यक्त केली जात आहे.

काही वर्षांपूर्वी अंमलीपदार्थांचा व्यवहार प्रामुख्याने किनारी भागांमध्ये दिसून येत होता. आता हे लोण राजधानी पणजीसह राज्यभर पसरलेले दिसतेय. सत्तरीसारख्या दुर्गम भागातील पेडलर पोलिसांच्या जाळ्यात सापडू लागल्याने या व्यवहाराची पाळेमुळे खोलवर गेल्याचे स्पष्ट झाले आहे. या वर्षाच्या पहिल्या सात महिन्यांत पोलिसांनी 62 गुन्हे दाखल करत सुमारे अडीच कोटींचे 98 किलो अंमलीपदार्थ जप्त केले आहेत. आता तरी अंमलीपदार्थविरोधी पथकासह नार्कोटिक्स सेंट्रल ब्युरोने अधिक सतर्क होणे गरजेचे आहे.