पेडणे केरी ते पणजी व्हाया शिवोली मार्गावरील कदंब वाहतूक महामंडळाची बस फेरी अनियमित असल्याने प्रवाशांचे अतोनात हाल होत आहेत. (Irregular Kadamba Bus Service)

कदंबने आपले ब्रीद विसरू नये तसेच फायद्यातील मार्गाचे खाजगीकरण होऊ देऊ नये,अशी मागणी त्रस्त प्रवाशांकडून होत आहे.

दरम्यान, या बससेवेबाबत पणजी आगारात विचारणा केल्यास,पर्यायी बस नसल्याचे सांगितले जाते. वाहक,चालक नसल्याची सबब सांगून बऱ्याचदा प्रवाशांची बोळवण केली जाते,असे केरकर नामक प्रवाशाने सांगितले.

गेले कित्येक दिवस,या मार्गावर सकाळी 6.30 वाजता, केरी ते पणजी धावणारी कदंब बस अनियमित आहे.

या बसवर अवलंबून असलेले विद्यार्थी, सरकारी तसेच खासगी क्षेत्रातील कर्मचारी व बांबोळी इस्पितळात औषधोपचार व नियमित तपासणीसाठी जाणाऱ्या वयोवृद्ध, ज्येष्ठ नागरिकांची फरफट होत आहे.

पणजी आगारातील कर्मचाऱ्यांकडूनच प्रवाशांना समाधानकारक प्रतिसाद मिळत नाही. त्यामुळे कदंबची लक्तरे वेशीवर टांगली जात आहेत. कदंब कर्मचाऱ्यांकडून बेजबाबदार उत्तरे येणार नाहीत, अशी दक्षता आमदार उल्हास तुयेकर यांनी घ्यावी,अशी प्रवाशांची अपेक्षा आहे.