केपेच्‍या कुशावती नदीला पुन्‍हा पूर आल्‍याने पारोडाचा भाग कालपासून पूर्णत: पाण्‍याखाली गेल्‍याने या गावाचा इतर गावांशी संपर्क तुटला आहे. याच आठवड्यात पारोडावासियांवर दोनवेळा ही वेळ आली आहे.

कालपासून पाऊस न थांबता पडत असल्‍यामुळे कुशावती नदीची पाण्‍याची पातळी वाढली असून रस्त्यावर पाणी आले आहे. तसेच परिसरातील गेले का दिवस शेती पाण्याखाली आहे. त्यामुळे ती खराब होण्याचा धोका आहे. पारोडा आणि अवेडे या दोन गावांना जोडणारा पूल पूर्णत: पाण्‍याखाली गेला असून त्‍यामुळे संपूर्ण या भागाला नदीचे स्वरूप आले आहे.

या भागात वाहणाऱ्या पाण्‍याचा प्रवाह प्रचंड असल्‍याने लोकांना घराबाहेर पडणे कठीण झाले आहे. पाणी काराळी गावापर्यंत पोहोचल्‍याने कालपासून या भागांचा बाकीच्‍या भागांशी संपर्क तुटला आहे. मडगावहून कुडचडेला जी वाहतूक होते, ती पारोड्याचा रस्‍ता पाण्‍याखाली गेल्‍याने विस्‍कळीत झाली असून ही वाहतूक आता चांदरमार्गे वळविण्‍यात आली आहे. यामुळेही या भागातील वाहतुकीवर परिणाम झाल्‍याने प्रवाशांचे अतोनात हाल झाले आहेत.

दत्तमंदिरापर्यंत पाणी!

केपे येथे दत्तमंदिराजवळ असलेल्‍या कुशावतीच्‍या पात्रातील पाणी वाढल्‍याने नदीचे पाणी आणखी पाऊस पडल्‍यास मंदिरापर्यंत पोहोचण्‍याची भीती व्‍यक्‍त केली जात आहे. त्यामुळे भाविकांना या मंदिरात जाणे कठीण झाले आहे. आणखी पाऊस पडल्यास हा रस्ताही पूर्णपणे बंद होणार आहे.