वाळपई: पर्ये सत्तरी येथील मॅनेजमेंट कॉलेजजवळील ग्रीन व्हॅली रेस्टॉरंटजवळ पार्किंगच्या किरकोळ वादातून दोन तरुणांमध्ये हाणामारी झाली. यावेळी धारदार शस्त्राने एका युवकावर हल्ला केल्याची घटना शुक्रवारी रात्री दोनच्या सुमारास घडली.

देऊळवाडा-कारापूर येथील योगेश सुभाष राणे (वय २७ वर्षे) याने हाऊसिंग बोर्ड, साखळी येथील अनिकेत सिंगबाळ (वय २७ वर्षे) याच्यावर धारदार शस्त्राने हल्ला करून त्याला गंभीर जखमी केले.

प्राथमिक माहितीनुसार, पार्किंगच्या जागेवरून वाद सुरू झाला. त्याचे रूपांतर हाणामारीत झाले. जखमी अनिकेतला तातडीने साखळी आरोग्य केंद्रात प्राथमिक उपचारासाठी नेले. नंतर पुढील उपचारासाठी त्याला गोमेकॉत हलविण्यात आले. सध्या त्याची प्रकृती स्थिर असल्याचे सांगण्यात आले.

वाळपई पोलिसांनी घटनास्थळी भेट देऊन पंचनामा केला असून संशयित योगेश राणे याला अटक करण्यात आली आहे. त्याच्या विरोधात खुनाचा प्रयत्न (कलम ३०७) केल्याचा गुन्हा दाखल करण्यात आला असून न्यायालयाने त्याला पाच दिवसांची पोलिस कोठडी सुनावली आहे. या प्रकरणाचा पुढील तपास पीएसआय प्रथमेश गावस करीत आहेत.