CCP Meeting On Pay Parking Tendering Process: राजधानीतील पे-पार्किंगच्या मुद्यावरून सोमवारी पालिकेत विशेष बैठक बोलावण्यात आली होती. या बैठकीत पे पार्किंग कंत्राटाच्या प्रक्रियेला महानगरपालिकेने अखेर मान्यता दिली. विशेष बैठकीमध्ये हा प्रस्ताव बहुमताने मंजूर झाला. 

मागील बैठकीत पे पार्किंगच्या कंत्राटाची मुदत संपूनही संबंधित कंपनी पार्किंग शुल्क आकारत आहे, ती गोळा होणारी रक्कम कोणाच्या खिशात जात आहे असा सवाल माजी महापौर तथा नगरसेवक सुरेंद्र फुर्तादो यांनी उपस्थित केला होता.

नगरसेवक उदय मडकईकर, सुरेंद्र फुर्तादो आणि ज्योएल आंद्रदे यांनी पे पार्किंग कंत्राटाच्या प्रक्रियेत घोटाळा झाल्याचा आरोप केला होता. मात्र, महापौर रोहीत मोन्सेरात यांनी सर्व आरोप फेटाळून लावले होते.

आज झालेल्या बैठकीत प्रस्ताव बहुमताने मंजूर झाला. १४ फेब्रुवारी २०२३ रोजी कंत्राटदाराची मुदत संपली होती. त्या कंत्राटदाराला २७ जानेवारी रोजी महापालिकेच्या बैठकीत सहा महिन्याची मुदत वाढ देण्यात आली.

यानंतर जुलै मध्ये निविदा काढण्यात आली. सोहम जुवारकर त्यांनी सर्वाधिक २.१ कोटीची बोली लावली. त्यांनी सुरक्षारक्कम म्हणून सुमारे १ कोटी ६० लाख रुपये महापालिकेकडे जमा केले आहेत.

नवीन कंत्राट १५ ऑगस्ट २०२३ पासून सुरू झाले अशी माहिती आयुक्त क्लेन मदेरा यांनी यावेळी दिली.

दरम्यान, फुर्तादो कंत्राटाचा मसुदा दाखवला नसल्याचा आरोप करत आहेत. मात्र, ते महापौर असताना जे कंत्राट होते तेच आता लागू करण्यात आले असून यामध्ये दोन गोष्टी नव्याने समाविष्ट करण्यात आल्या आहेत. निविदेची रक्कम त्यांच्या काळातील निविदे पेक्षा खूप जास्त आहे असे महापौर रोहित मोन्सेरात यांनी म्हटले आहे.