पणजी: पणजी शहर स्मार्ट बनविण्याचे इंद्रधनुष्य ‘इमेजिन पणजी स्मार्ट सिटी विकास लिमिटेडने (आयपीएससीडीएल) पेलले आहे. सध्या दुसऱ्या टप्प्याचे काम गतीने सुरू आहे. या कामांमुळे खोदकाम झालेल्या डबऱ्यात खनिज खात्याचे अनेक वर्षांपासून बंद पडलेले वाहन अडकून पडले की काय? असा सवाल उपस्थित होत आहे.

गोवा चेंबर ऑफ कॉमर्सकडून भोसले कॅफेकडे जाणाऱ्या रस्त्यालगत खाण खात्याचे वाहन पार्किंगच्या जागेत उभे करण्यात आले आहे. मागील काही वर्षांपासून हे वाहन येथेच पडून आहे. याशिवाय पणजीत अनेक ठिकाणी रस्त्यालगत वाहने पडून आहेत. पाटो येथे नगर विकास प्राधिकरणाची कार अनेक वर्षांपासून उभी आहे. त्याशिवाय एक खासगी कारही अनेक वर्षांपासून तिथे धूळखात पडून आहे. याशिवाय पाटोवरील खासगी बस थांब्यापासून कदंब बसस्थानकाकडे जाणाऱ्या मार्गावर दोन कार अशाच धूळ खात पडलेल्या आहेत.

महत्त्वाची बाब म्हणजे स्मार्ट सिटीचे काम सुरू असतानाही खनिज खात्याचे वाहन हटविण्याचे किंवा तेथून दुसरीकडे नेण्याची हिंमत ‘इमॅजिन पणजी’ला झालेली नाही. आता खनिज खाते आपले वाहन कधी काढून नेणार, हे पहावे लागणार आहे. अशाच प्रकारे इतर ठिकाणीही धूळ खात वाहने पडलेली आहेत, त्याविरोधात कोणते खाते मोहीम उघडणार हे लवकरच दिसून येईल.

सांतिनेजमध्ये सांडपाण्याने भरला खड्डा

सांतिनेजमध्ये स्मार्ट रस्ते केले असले तरी केबल जोडणीची कामे बाकी आहेत. काही ठिकाणे खड्डे उघडे ठेवले आहेत.‘हमारा स्कूल’समोरच एका खड्ड्यात सांडपाणी जाऊन तो खड्डा भरला आहे आणि त्यामुळे डासांची उत्पत्ती होत आहे. याविषयी मनपाला स्थानिकांनी कळविले, शिवाय एकाने महापौरांनाही कल्पना दिली. त्यांनी सोमवारी पाहणीचे आश्‍वासन दिले. पण ते काही फिरकलेच नाहीत.