पणजी: स्मार्ट सिटी अंतर्गत कला संचालनालयाच्या मागील बाजूस रुआ दी ओरेम खाडीतील खारफुटीचा वापर करून ‘बोर्डवॉक’ साकारण्यात आला. परंतु गेली दोन वर्षांपासून या ‘बोर्डवॉक’ची दयनीय अवस्था झाली आहे. आता या ‘बोर्डवॉक’च्या दुरुस्तीचे काम महानगरपालिका हाती घेणार असल्याची माहिती समोर आली आहे. पण नेमके काम कधी सुरू होणार याबाबत स्पष्टता मात्र नाही.

स्मार्ट सिटीच्या अमृत योजनेअंतर्गत सर्वात पहिला प्रकल्प म्हणून इमेजिन पणजी स्मार्ट सिटी विकास लिमिटेड या संस्थेने हाती घेतला होता. ‘बोर्डवॉक' या खारफुटीत निर्माण केलेल्या लाकडी पुलाला सुस्थितीत असताना दररोज हजारो लोक भेट देत असत. त्यात युवक-युवतींचा भरणा अधिक होता.

परंतु गेल्या काही महिन्यांपासून या ‘बोर्डवॉक’च्या फळ्या तुटल्या असल्याने तो धोकादायक झाला, त्यामुळे तेथे प्रवेश बंदी केली आहे. तरीही अनेक जोडपी या धोक्याकडे दुर्लक्ष करून येथे निवांतपणा शोधायला येतात. या धोकादायक बोर्डवॉकविषयी सतत ‘गोमन्तक'ने सचित्र वृत्तांत प्रसिद्धही केला होता.

दोन वर्षांनी महानगरपालिकेने या ‘बोर्डवॉक’ची दुरुस्त करण्याचा विचार केला आहे. त्यासाठी अंदाजपत्रक तयार केले जात असून, येत्या बैठकीत त्याला मंजुरी मिळण्याची शक्यता आहे.‘बोर्डवॉक’चे लाकडी काम खराब झाले आहे.

इमॅजिन पणजी स्मार्ट सिटी डेव्हलपमेंट लिमिटेडने २.५ कोटी रुपये खर्चून बांधलेला हा ‘बोर्डवॉक’ २०१८ मध्ये खुला केला होता. दुर्लक्षामुळे शहराचे पर्यावरणीय आकर्षण पाच वर्षांपेक्षा कमी कालावधीत उद्ध्वस्त झाले आणि अखेर २०२३ मध्ये ते बंद पडले. तत्पूर्वी स्मार्ट सिटीने २०२२ मध्ये हा प्रकल्प महानगरपालिकेकडे सोपवून त्या जबाबदारीतून मुक्तता करवून घेतली होती. यापूर्वी या बोर्डवॉकची किरकोळ दुरुस्तीदेखील करण्यात आली होती.