2008 साली घडलेल्‍या आणि आता या प्रकरणाची सुनावणी सुरू झाल्‍यामुळे पुन्‍हा एकदा चर्चेत आलेल्‍या बाबूश मोन्‍सेरात आणि त्‍यांच्‍या समर्थकांकडून झालेल्‍या पणजी पोलिस स्‍थानक हल्‍ला प्रकरणातील सुनावणी आता रंगू लागली आहे. पणजीचे तत्‍कालीन पोलिस निरीक्षक आणि सध्‍याचे उपअधीक्षक सुदेश नाईक यांची साक्ष लक्षवेधक ठरत आहे.

खास न्‍यायाधीश इर्शाद आगा यांच्‍यासमोर शुक्रवारी (ता.28) दिलेल्‍या साक्षीत नाईक यांनी शेकडो लोकांचा मोर्चा घेऊन बाबूश मोन्‍सेरात पणजी पोलिस स्‍थानकावर चाल करून आले होते.

हा जमाव प्रक्षोभक बनल्‍यावर नियंत्रणात येत नसल्‍याने शेवटी सहावेळा हवेत गोळीबार करण्‍यात आला, असे सांगितले. नाईक यांची सरतपासणी अजूनही चालू असून यापुढील सुनावणी 9 जून रोजी होणार आहे.

असे घडले प्रकरण

• फेब्रुवारी 2008 मध्‍ये ताळगावचे तत्‍कालीन आमदार बाबूश मोन्‍सेरात यांच्‍या काही कार्यकर्त्यांना पणजी पोलिसांनी अटक केल्‍यानंतर विरोधी गटातील संशयितांनाही अटक करा, अशी मागणी घेऊन हा जमाव पोलिस स्‍थानकावर आला होता.

• पोलिसांच्‍या आरोपपत्राप्रमाणे त्‍यावेळी मोन्‍सेरात यांनी प्रक्षोभक भाषण केल्‍याने जमाव खवळला आणि त्‍यांनी पोलिसांवर दगडफेक केली. या दगडफेकीत कित्‍येक पोलिस जखमी झाले.

• या प्रकरणात तपास करण्‍यास सीबीआयने बाबूश मोन्‍सेरात व त्‍यांच्‍या पत्‍नी जेनिफर मोन्‍सेरात यांच्‍यासह एकूण ३७ जणांवर आरोपपत्र दाखल केले होते.