पणजी: राज्यात सध्या पावसामुळे समुद्रात मासेमारीस बंदी घालण्यात आली आहे. त्यामुळं नागरिकांना ताज्या समुद्री मासळीचा स्वाद घ्यायला मिळत नाहीय. मात्र, शुक्रवारी (११ जुलै) पणजीतील मत्स्यव्यवसाय विभागाने नागरिकांसाठी पांढऱ्या पायांची कोळंबी विक्रीस आणली होती. या विक्रीसाठी विभागाच्या कार्यालयाबाहेर स्थानिक नागरिकांची मोठी गर्दी पहायला मिळाली. कोळंबी खरेदीसाठी नागरिकांनी रांग लावली होती.

प्रथम येणाऱ्यास प्राधान्य

या कोळंबीची किंमत फक्त ३५० रुपये किलो इतकी ठेवण्यात आली होती. विक्री "प्रथम येणाऱ्यास प्राधान्य" या तत्त्वावर सुरू होती, त्यामुळे लवकर येणाऱ्यांना कोळंबी मिळाली, तर उशिरा आलेल्यांना रिकाम्या हाताने परतावे लागलं. एक व्यक्ती जास्तीत जास्त २ किलो कोळंबी खरेदी करू शकतो, अशी अट ठेवण्यात आली होती.

मत्स्यव्यवसाय विभागातर्फे २०० किलो कोळंबी विक्रीसाठी आणण्यात आली होती. ही कोळंबी थेट मत्स्य प्रकल्पातून आणलेली असल्याने नागरिकांमध्ये तिची मागणी अधिक होती. शुद्ध, दर्जेदार आणि स्वस्त दरातील कोळंबी मिळणार, या आशेने नागरिकांनी मोठ्या संख्येने विभागाच्या कार्यालयात गर्दी केली होती.

१३० ते १४० नागरिकांनी कोळंबी खरेदी केली. काही तासांतच सगळी कोळंबी संपली आणि विभागाला ३५० रुपये प्रति किलो दराने सुमारे ७० हजार रुपयांचे उत्पन्न मिळाले. याआधी विभागातर्फे एला ओल्ड गोवा येथील फिश फार्ममध्ये असा प्रयोग करण्यात आला होता.

राज्यात सध्या जोरदार पावसामुळे मासेमारी बंद असून, त्यामुळे बाजारात ताजी मासळी दुर्मिळ झाली आहे. त्यामुळे मत्स्यविभागाच्या या प्रयोगामुळे खवय्यांना शुद्ध, दर्जेदार कोळंबीचा आस्वाद घेता आला.