Panaji Bhatale Murder Case Arvind Tiwari Background

पणजी: भाटले-पणजी येथील जॉन याचा खून करण्यासाठी संशयित अरविंद तिवारी याने वापरलेला चाकू पणजी पोलिसांनी जप्त केला आहे. संशयिताची पार्श्‍वभूमी गुन्हेगारीची असून यापूर्वी त्याने उत्तर प्रदेशमधील एका व्यावसायिकाचा खून केला होता व इतर काही गुन्ह्यांमध्येही त्याच्यावर तक्रारी दाखल आहेत. टीव्हीवर क्राईमसंदर्भात दाखवण्यात येणाऱ्या मालिकांमधून माहिती घेऊन गुन्हे केल्याचे चौकशीत सांगितले आहे, अशी माहिती पणजी पोलिसांनी दिली.

संशयित अरविंद तिवारी याने २०१५ साली लखनऊ (उत्तर प्रदेश) येथील गौतम बॅनर्जी नामक व्यावसायिकाचा इतरांच्या साथीने खून केला होता. त्याला अटक झाली होती. २०१८ मध्ये त्याची जामिनावर सुटका झाली होती. जामिनावर सुटका झाल्यापासून तो तेथील न्यायालयातील खटल्यावरील सुनावणीला उपस्थित राहिलेला नाही.

तो गेल्या ३ नोव्हेंबरला गोव्यात आला होता व भाटले येथील बांधकामाच्या ठिकाणी काम करत होता. त्याला कंत्राटदाराने प्रतिदिन ८०० रुपये मजुरी देण्याचे मान्य केले असताना त्याला ६०० रुपये प्रतिदिन या हिशोबाने २७ दिवसांचा पगार दिला होता. त्यामळे त्याला राग होता. यावेळी जॉन याने काही क्षुल्लक कारणावरून आपली चेष्टा करण्यास सुरुवात केल्यावर रागाच्या भरात तेथे असलेल्या चाकूने त्याचा गळा चिरला, अशी कबुली अरविंदने पोलिसांकडे दिली आहे.

मालिका बघून गुन्हे

टीव्हीवर गुन्ह्यांची माहिती देणाऱ्या मालिका दाखवल्या जातात त्यातून गुन्हे केले आहेत. या गुन्ह्याबाबत कोणताही पश्‍चात्ताप वाटत नाही, असे आरोपी अरविंदने सांगितले.