पणजी: पणजीतील ‘अटल सेतू’ पुलाखाली मणिपूर राज्यातील २९ वर्षीय टोनटांग मोरोंगशेल या युवकाचा कुजलेला मृतदेह आढळल्याने खळबळ उडाली आहे. या प्रकरणी पणजी पोलिसांनी अनैसर्गिक मृत्यूची नोंद करून तपास सुरू केला आहे.

पोलिससूत्रांनी दिलेल्या माहितीनुसार, गुरुवारी एका अनोळखी व्यक्तीने केलेल्या फोनवरून पोलिसांना अटल सेतूखाली एक मृतदेह पडल्याची माहिती मिळाली. त्यानंतर महिला पोलिस उपनिरीक्षक सपना गावस यांच्या नेतृत्वाखाली पथकाने तत्काळ घटनास्थळी धाव घेतली.

फोंड्याकडून पणजीतील क्रांती सर्कलजवळील मल्टिपर्पज पार्किंगकडे जाणाऱ्या रस्त्यालगतच्या ‘अटल सेतू’ पुलाखाली मृतदेह आढळल्याची माहिती पोलिसांनी दिली. मृताच्या शर्ट्सच्या उजव्या खिशात मतदार ओळखपत्र तसेच कोटक महिंद्रा बँक आणि पंजाब नॅशनल बँकेचे प्रत्येकी एक असे दोन एटीएम कार्ड सापडले. या दस्तऐवजांच्या आधारे मृताची ओळख पटविण्यात आली.

पोलिसांनी सांगितले की, मृतदेह अत्यंत कुजलेल्या अवस्थेत होता. या प्रकरणी अनैसर्गिक मृत्यूची नोंद करण्यात आली असून घटनेचा तपास सुरू आहे. मृताच्या नातेवाईकांचा शोध घेण्याबरोबरच, तो गोव्यात कशासाठी आला होता आणि घटनेच्या दिवशी तो कुठे होता याची माहिती गोळा करण्याचे प्रयत्न सुरू आहेत.