Goa Politics:

केंद्रीय नेतृत्वाने दक्षिण गोव्यात माजी खासदार ॲड. नरेंद्र सावईकर आणि माजी उपमुख्यमंत्री चंद्रकांत कवळेकर तसेच इतरही खासदारकीच्या उमेदवारीसाठी इच्छुक होते; परंतु त्यांना मागे टाकत उद्योजक श्रीनिवास धेंपे यांच्या पत्नी पल्लवी धेंपे यांना दक्षिणेतील उमेदवारी जाहीर करण्यात आली.

त्यांना रविवार, 24 रोजी उमेदवारी जाहीर झाल्यानंतर सोमवार, 25 रोजी त्यांनी श्रीनिवास धेंपे जे पणजी शिमगोत्सव समितीचे अध्यक्ष आहेत यांच्यासह जाऊन श्री महालक्ष्मी देवीचे दर्शन घेत ओटी भरली. त्यामुळे माहेरच्या देवाचा आशीर्वाद घेऊन एकाअर्थी राजकारणात सक्रिय झाल्याचे संकेत त्यांनी दिले.

यापूर्वी शिमगोत्सव समिती गुलालोत्सवाचे नमन करायला जायची त्यावेळी केवळ श्रीनिवास धेंपे उपस्थित असायचे त्यांच्या पत्नी पल्लवी या कधीच नसायच्या त्यामुळे त्या प्रचाराचा नारळ फोडून आशीर्वाद घेण्यासाठी आल्या आहेत, असा काहीजणांमध्ये संभ्रम निर्माण झाला.

जर पल्लवी धेंपे निवडणूक जिंकल्या तर दक्षिण गोव्यातून खासदार होणाऱ्या पहिल्या महिला उमेदवार ठरतील. भाजपने गोव्यात पहिल्यांदा महिलेला लोकसभेची उमेदवारी दिली आहे, त्यामुळे जर त्या निवडून आल्यास भाजपप्रणीत पहिल्या महिला खासदार ठरतील.

भाजप आज फोडणार प्रचाराचा नारळ
गोवा भाजपतर्फे मंगळवार, 26 रोजी दु. 3.30 वा. पणजीतील श्री महालक्ष्‍मी देवीचा आशीर्वाद घेऊन लोकसभा निवडणुकीच्या प्रचाराचा नारळ फोडला जाणार आहे. उत्तर गोवा उमेदवार तथा खासदार श्रीपाद नाईक, दक्षिण गोवा उमेदवार पल्लवी धेंपे यांच्या प्रचाराला याद्वारे खऱ्या अर्थाने सुरवात होणार आहे.