Incorrect placement of sound meters during Sunburn event

पेडणे: सनबर्न महोत्सवात ध्वनी प्रदूषण होते की नाही, हे तपासण्यासाठी जागोजागी ध्वनिमापन यंत्रणा बसविली आहे. मात्र, सनबर्न विरोधकांनी आज रेडकर हॉस्पिटलाला भेट दिली, त्यावेळी ध्वनी मापन यंत्रणा हॉस्पिटल इमारतीच्या मागे एका कोपऱ्यात बसविल्याचे दिसून आले.

यंत्रे बसविण्याची जागा मुद्दाम चुकीच्या ठिकाणी निवडली, जेणेकरून मोठ्या आवाजाची नोंद होऊ शकणार नाही, असा आरोप स्थानिकांनी केला. तर ओशेलबाग येथे लोकवस्तीत बसविण्यात आलेली ध्वनिमापन यंत्रणा बंद असल्याचे ग्रामस्थांनी केलेल्या पाहणीवेळी आढळून आले.

सनबर्न आयोजकांनी न्यायालयात सांगितल्याप्रमाणे लोकांना त्रास होऊ नये म्हणून उपाययोजना केली आहे का, याची पहिल्या दिवसापासून पाहणी करण्यासाठी याचिकादार भारत बागकर, महेश प्रभुदेसाई, महादेव पटेकर, रोहिदास हरमलकर यांनी उपजिल्हाधिकारी शिवप्रसाद नाईक यांची भेट घेतली असता, आमचे पथक आयोजकांवर लक्ष ठेवून आहे, असे उपजिल्हाधिकारी नाईक यांनी सांगितले.

७ जानेवारी रोजी सुनावणी

धारगळ पंचायतीने कार्यक्रम सादर करण्यास ना हरकत दाखला दिल्यानंतर ग्रामस्थांनी न्यायालयात याचिका सादर केली होती. यावर सुनावणी होऊन अनेक अटींसह सनबर्न महोत्सवाला मान्यता देऊन पुढील सुनावणी ७ जानेवारी रोजी ठेवण्यात आली आहे.