पणजी: सुमार कामगिरीवरून सरकारला घेरण्यासाठी विरोधकांनी विधानसभा अधिवेशनासाठी रणनीती निश्चित केली आहे. विरोधी पक्षनेते युरी आलेमाव यांच्या विधानसभा संकुलातील कक्षात यासाठी विरोधी आमदारांनी एक बैठक घेतली. या बैठकीला आलेमाव यांच्यासह गोवा फॉरवर्डचे अध्यक्ष तथा आमदार विजय सरदेसाई, आमदार एल्टन डिकॉस्ता, कार्लुस आल्मेदा, ‘आप’चे वेन्झी व्हिएगस उपस्थित होते.

‘आरजी’चे आमदार वीरेश बोरकर हे विरोधकांसोबत आहेत का, अशी विचारणा आलेमाव यांना करण्यात आली. कारण या बैठकीला ते उपस्थित नव्हते. त्यावर आलेमाव म्हणाले, सत्ताधारी किंवा विरोधक असे दोनच गट असतात. ते विरोधातच आहेत. विरोधात नसतील तर सत्ताधारी गटात असावे लागतील. कारण अन्य तिसरा गट नसतो.

आझाद मैदानावर अधिवेशन भरवा

विजय सरदेसाई (Vijai Sardesai) यांनी सांगितले की, केवळ दोनच दिवसांचे अधिवेशन घेण्याचा सरकारी निर्णय म्हणजे लोकशाहीची थट्टा आहे. मला वाटते, त्यात सहभागी होऊ नये; कारण आपण त्यात सहभागी होणे म्हणजे त्याला साथ देण्यासारखे आहे. मात्र, विरोधी पक्षाने सहभागी होण्याचे ठरविल्याने मीही सहभागी होणार आहे.