Goa Sand Mafia: मुंबई उच्च न्यायालयाने बेकायदेशीररित्या केले जाणारे रेती उत्खनन बंद करा, असा आदेश दिला असला तरी हा आदेश धाब्यावर बसवून शिरोडा आणि दिगास-पंचवाडी या भागात रेती उत्खनन खुलेआम सुरू आहे. 60 ट्रकमधून रात्री हा सर्व रेती उत्खनन आणि वहनाचा खेळ चालत असल्याचे समोर आले आहे.

या गोष्टीकडे प्रशासकीय अधिकाऱ्यांनी दुर्लक्ष केले असून पोलिसही काहीच माहीत नाही, अशा आविर्भावात आहेत. कुडतरीनजीक झुवारी नदीत सक्शन पंपद्वारे ही रेती काढली जाते आणि नंतर होड्यांतून पंचवाडी येथे दिगाशेर आणि शिमेर या भागात आणून ठेवली जाते.

हा सर्व खेळ रात्रीच्या काळोखात सुरू असतो. रात्रीच ही रेती ट्रकमध्ये भरून त्याची वाहतूक केली जाते. रात्री 12 ते पहाटे 5 वाजेपर्यंत हा खेळ सुरू असतो. पहाटे 5 च्या ठोक्याला हे गोरखधंदे बंद केले जातात.

60 ट्रकांचा ‘रात्रीस खेळ चाले’

पंचवाडी येथून ही रेती भरून आणण्यासाठी दररोज किमान 60 ट्रक वापरले जातात. रात्रभर ही वाहतूक सुरू असते. या ट्रकच्या घरघरीमुळे लोकांच्या झोपेचे खोबरे होत आहे, अशी तक्रार स्थानिकांतून होत आहे. पूर्वी हे उत्खनन सावर्डे-कुडचडे भागात मोठ्या प्रमाणात सुरू होते.

मात्र, मागच्या वर्षी या व्यवसायाच्या वैमनस्यातून कुडचडेत एक खून झाल्यावर कुडचडे पोलिस स्थानकाच्या हद्दीत सुरू असलेले उत्खनन पूर्णपणे बंद करण्यात आले. या हद्दीला लागून असलेल्या भागात ते अजूनही सुरू असून पोलिस आणखी काही दुर्घटना घडण्याची वाट पाहात आहेत का, असा सवाल लोक करत आहेत.