वास्को येथे ऑनलाईन लॉटरी चालणावणाऱ्या टोळीला पोलीस खात्याच्या गुन्हे अन्वेषण शाखेने रंगेहात पकडले. सदर घटना आज मध्यरात्री घडली जेव्‍हा गुन्हे अन्वेषण शाखेच्या पथकाने सुमारे 1.48 वा. सिने वास्कोच्या समोर असलेल्या दुकानावर धाड टाकली.

यात शाखेच्या पथकाला ऑनलाईन लॉटरी चालवणारे दोन संशयित आरोपी, तसेच त्यासाठी वापरण्यात येणारा कॉम्पुटर आणि 35 हजार रुपये रोख रक्कम सापडला. प्रकरणात संशयित आरोपी राधेश्‍याम चौहान (51, वास्को) आणि अनविंद चौहान (21, वास्को) याना अटक करून जामिनावर सोडण्यात आले आहे. प्रकरणाचा तपास गुन्हे अन्वेषण शाखेचे उपनिरीक्षक गिरीश पाडलोस्कर करत आहे, अशी माहिती पोलीस खात्याने दिली.

दरम्यान, सायबर क्राईम कक्षाने जुने गोवे येथील सनशाईन स्कूलजवळ एका बंगल्यामध्ये सुरू असलेल्या बनावट कॉल सेंटरचा पर्दाफाश केला. या कारवाईत या सेंटरचा प्रमुख सूत्रधार महम्मद रामीज एम. घान्ची ऊर्फ रॉय फर्नांडिस (32, गुजरात) याच्यासह इतर 8 पुरुष व 8 महिला कर्मचारी मिळून 16 जणांना अटक केली. तसेच 14 लॅपटॉप, 8 मोबाईल तसेच इतर साहित्य जप्त केल्याची माहिती पोलिस निरीक्षक राहुल परब यांनी दिली.