पणजी: कोविडच्या वाढत्या प्रकरणांमुळे भाजप सरकार विद्यार्थी समुदायासाठी ऑनलाइन परीक्षा घेण्यास अपयशी ठरल्यास मुख्यमंत्र्यांच्या निवासस्थानासमोर आंदोलन करण्याचा इशारा नॅशनल स्टुडंट्स युनियन ऑफ इंडिया (NSUI) गोवाचे अध्यक्ष नौशाद चौधरी (Naushad Chaudhary) यांनी दिला आहे. चौधरी यांच्यासह विविध महाविद्यालयांतील विद्यार्थ्यांनी गुरुवारी गोवा विद्यापीठात (Goa University) एकत्र येऊन ऑनलाइन परीक्षा घेण्याची मागणी केली.

ऑनलाइन परीक्षा (Online exam) घेतल्यास विद्यार्थ्यांना भविष्यात नोकरी मिळण्यात अडचणी येतील, असे गोवा विद्यापीठाचे अधिकारी सांगत आहेत. मात्र, कोविड-19 (COVID-19) दररोज हजारो लोकांमध्ये पसरत आहे. सध्या आमचे प्राधान्य आमचे जीवन वाचवणे आहे आणि नोकऱ्या मिळवणे नाही. ऑफलाइन परीक्षेदरम्यान एखाद्याला कोविडची लागण झाल्यास आणि त्याचा बळी गेल्यास त्याला कोण जबाबदार असेल असा प्रश्‍न त्यांनी केला. विद्यार्थ्यांना (Students) कोविडची लागण झाल्यास पालकांच्या जिवाला धोका निर्माण होण्याची शक्यता नाकारता येत नाही असे ते म्हणाले.

मुख्यमंत्र्यांनी होकार दिल्यास ऑनलाइन परीक्षा घेण्याचे आश्वासन कुलगुरूंनी दिले आहे. त्यामुळे मुख्यमंत्र्यांनी एका दिवसात यावर निर्णय घ्यावा, अन्यथा त्यांच्या निवासस्थानासमोर आंदोलन करण्यात येईल. ऑनलाइन परीक्षा घेण्याची मागणी करणारे निवेदन दिले होते. कोविडचा प्रसार रोखण्यासाठी पुन्हा ऑनलाइन वर्ग सुरू करावेत. गोवा सरकारने कोविड नियंत्रणासाठी कोणतीही उपाययोजना केलेली नाही, असे त्यांनी सांगितले.