फोंडा: फोंडा बाजार परिसरातील सोपो कराचे कंत्राट या मार्च महिन्यात संपत असून संबंधित कंत्राटदाराला पुढील एक महिना वाढवून देण्याचा निर्णय फोंडा पालिकेच्या आज (मंगळवारी) झालेल्या बैठकीत घेण्यात आला.

पुढील महिन्यानंतर सोपोकराचा पुन्हा लिलाव करायचा, की पालिकेच्या कामगारांकडून हा सोपो कर वसूल करायचा, यासंबंधीचा निर्णय घेण्यात येईल. मात्र, त्यापूर्वी सोपो करासंबंधीचे सर्वेक्षण करूनच हा निर्णय होईल, असे फोंड्याच्या नगराध्यक्ष गिताली तळावलीकर यांनी स्पष्ट केले.

फोंडा पालिकेच्या या बैठकीला नगराध्यक्ष गिताली तळावलीकर, उपनगराध्यक्ष जया सावंत तसेच इतर नगरसेवक उपस्थित होते. पालिका मुख्याधिकारी योगिराज गोसावी यांनी बैठकीचे कामकाज हाताळले.

फोंडा पालिका अखत्यारीतील सोपो कराचे कंत्राट मार्चमध्ये संपत आहे. मात्र, अजून नवीन लिलाव करण्यात आलेला नाही. त्यामुळे सोपो कराचा लिलाव करण्यापूर्वी संबंधित कंत्राटदाराला एक महिना मुदतवाढ देण्यात येईल. पालिका क्षेत्रातील विक्रेत्यांना ‘वेंडर कार्ड' देण्यासंबंधीचा निर्णयही यावेळी झाला.

फोंडा पालिकेच्या मार्केट संकुलातील बहुतांश दुकाने पडून असून लिलावाला ग्राहकांचा प्रतिसाद लाभत नाही. दुकाने विनावापर पडून असल्याने पालिकेला निधीही उपलब्ध होत नाही. सार्वजनिक बांधकाम खात्याने ठरवून दिलेल्या दरानुसार हा लिलाव करण्यात येत असल्याने ग्राहक हा दर परवडत नसल्याचे सांगत आहे.

लिलावाचा दर परवडेना : दुकानासाठी सुरक्षा अनामत म्हणून पालिकेने एक लाख रुपये दर ठरवला आहे. त्यामुळे हे दर परवडत नसल्याच्या कारणामुळेच दर वेळेला लिलाव केला जात असला तरी त्याला अपेक्षित प्रतिसाद मिळत नाही. यासंबंधी बैठकीत चर्चा करून लिलावाच्यावेळी दर कमी करण्यासंबंधी निर्णय झाला.

प्रतिदिन सातशे रुपये द्या!

पालिकेतील रोजंदारी कामगारांना प्रतिदिन सातशे रुपये देण्याची मागणी करण्यात आली आहे. यासंबंधीचे निवेदन पालिकेकडे आले असून बैठकीत ठेवले असता, त्यावर चर्चा करूनच योग्य निर्णय घेण्यात येईल, असे नगराध्यक्ष गिताली तळावलीकर यांनी सांगितले.