फोंडा : फोंडा पोलिस स्थानकाच्या हद्दीत काल रविवारी सायंकाळी झालेल्या तीन वेगवेगळ्या अपघातांत एकाचा मृत्यू; तर 17 जण जखमी झाले. पार उसगाव-खांडेपार येथील जीपगाडी व दुचाकीच्या जोरदार टकरीत वाघोण-दाभाळ येथील प्रकाश गावकर (वय 55) यांचा जागीच मृत्यू झाला. ते वनखात्याचे कर्मचारी होते.

दुसऱ्या एका अपघातात बोंडलाहून परतणाऱ्या पर्यटक बसगाडीला अपघात होऊन बसगाडी उलटल्याने बारा पर्यटक प्रवासी जखमी झाले. या प्रवाशांना पिळये-तिस्क येथील आरोग्य केंद्रात उपचारासाठी नेण्यात आले. त्यातील काहीजणांना बांबोळी इस्पितळात अधिक उपचारांसाठी दाखल करण्यात आले; तर बायथाखोल-बोरी येथील तिसऱ्या अपघातात दोन कारगाड्यांच्या जोरदार ठोकरीमुळे पाचजण जखमी झाले.

फोंड्याहून तिस्क-उसगावच्या दिशेने जाणाऱ्या (GA-05-T-4268) जीपगाडीने समोरून चालणाऱ्या (GA-12-B-3850) दुचाकीला जोरदार ठोकर दिली. दोन्ही वाहने एकाच दिशेने जात होती; पण जीपगाडी भरधाव असल्याने दुचाकीस्वाराला त्याचा अंदाज आला नसल्याने हा अपघात झाल्याचे समजते. या ठोकरीनिशी दुचाकीस्वार दुचाकीसह रस्त्यावर कोसळला. जीपगाडीने स्वारासह दुचाकीला फरफटत पुढे नेले. त्यात गावकर यांच्या डोक्याला गंभीर इजा झाल्याने त्यांचा जागीच मृत्यू झाला.

या अपघाताला कारणीभूत ठरलेला जीपगाडीचा चालक उसगाव येथील सचिन खराडे (वय 42, मूळ कोल्हापूर) याला फोंडा पोलिसांनी ताब्यात घेतले. फोंडा पोलिस याप्रकरणी तपास करत आहेत.

एअर बॅगमुळे प्राण वाचले

बायथाखोल-बोरी येथे फोंड्याहून बोरीच्या दिशेने जाणारी (GA-06-D-1528) कारगाडी व बोरीहून फोंड्याच्या दिशेने येणाऱ्या (GA-05-F-3223) कारगाडीत जोरदार टक्कर झाली. या अपघातात जयेश नाईक, मनोहर नाईक, नरेश शिरोडकर, सर्वेश नाईक व दिलीप माणगावकर हे कारमधील प्रवासी जखमी झाले. अपघातावेळी एअर बॅग फुलल्यामुळे त्यांचे प्राण वाचले.