मडगाव : मायणा कुडतरी परिसरात एका अल्पवयीन मुलीवर अत्याचार झाल्याचा धक्कादायक प्रकार उघडकीस आला आहे. 15 वर्षीय मुलीला फसवून तिच्यावर अत्याचार करणाऱ्या 22 वर्षीय तरुणाला पोलिसांनी बेड्या ठोकल्या आहेत. तरुणीला उपचारासाठी रुग्णालयात दाखल करण्यात आलं आहे.

सासष्टी (Salcete) तालुक्यातील मायणा कुडतरी भागात एका 15 वर्षीय अल्पवयीन मुलीवर बलात्काराची घटना घडली आहे. 22 वर्षीय तरुणाने हे कृत्य केल्याची माहिती असून पोलिसांनी तरुणाला लागलीच अटकही केली आहे. अल्पवयीन मुलगी ही आरोपीच्या घरी पाणी भरण्यासाठी गेली होती. याचवेळी कुणीही नसल्याचा फायदा घेत आरोपीने मुलीवर बलात्कार (Rape) केला. यानंतर मुलीची प्रकृती बिघडल्याने तिला खासगी रुग्णालयात दाखल करण्यात आलं आहे.

मुलीच्या कुटुंबीयांनी दिलेल्या तक्रारीनंतर पोलिसांनी आरोपीला अटक (Arrest) केली आहे. पीडित तरुणीवर सध्या खासगी रुग्णालयात उपचार सुरु असून ती मानसिक धक्क्यात असल्याची माहिती आहे. पोलिसांनी (Police) मुलीचा जबाब नोंदवण्याचं काम सुरु केलं असून तपासही सुरु करण्यात आला आहे. आरोपीची चौकशी करण्यात येत असून आरोपीला कोर्टात हजर केलं जाणार आहे.