Goa News: ॲडमिशनच्या बहाण्याने साडेआठ लाखांची फसवणूक

मडगाव: वैद्यकीय शिक्षणासाठी प्रवेश देण्याच्या बहाण्याने कुडतरी येथील एका विद्यार्थिनीच्या पालकांना साडेआठ लाखांना गंडा घालण्याचा आरोप असलेल्या संशयितांना अटक करण्यासाठी गोवा पोलिस बंगळुरूला रवाना झाले आहेत. बुधवारी याप्रकरणी मायणा-कुडतरी पोलिस स्थानकात केरन फर्नांडिस, जॉयल जॉय आणि टॉमसी जॉय या तिघांविरुद्ध गुन्हा नोंद केला आहे. कुडतरी येथील एका विद्यार्थिनीला बेळगाव येथील केईएल महाविद्यालयात बीडीएस अभ्यासक्रमासाठी प्रवेश देण्याच्या बहाण्याने हे पैसे घेतले होते. मात्र, बेळगाव येथे पोचल्यावर त्यांना आपली फसवणूक झाल्याचे समजले. याप्रकरणी पोलिसांत तक्रार नोंदवल्यानंतर तपास सुरू करण्यात आला आहे.