Ram Mandir Consecration: अयोध्येत होणाऱ्या प्रभू श्रीराम मूर्ती प्राणप्रतिष्ठापना सोहळ्यादिवशी म्हणजेच सोमवारी (ता. २२) राज्यातील मंदिरे आणि धार्मिक स्थळांवर श्री राम पूजन मोठ्या उत्साहात करण्यात येणार आहे. यादिवशी राज्यातील अनेक ग्रामपंचायतींनी त्यांच्या क्षेत्रात मद्य, तसेच मांसाहारी पदार्थ विक्रीवर बंदी घातली आहे.

यानिमित्त अस्नोडा पंचायतीने एक परिपत्रक जारी केले आहे. त्यानुसार, येत्या सोमवारी २२ रोजी अस्नोडा पंचायत कार्यक्षेत्रातील सर्व दुकाने, मद्यालये, चिकन सेंटर व मासळी मार्केट बंद ठेवावे असे निर्देश दिलेत.

उपलब्ध माहितीनुसार, येत्या २२ रोजी अयोध्येत श्रीराम मंदिरात रामलल्लांची मूर्ती प्राणप्रतिष्ठापना होणार आहे. त्याअनुषंगाने देशभर प्राणप्रतिष्ठापना सोहळ्यानिमित्त विविध कार्यक्रम तसेच धार्मिक उत्सव साजरे केले जात आहे.

त्याच अनुषंगाने अस्नोडा पंचायतीने परिपत्रक जारी करीत आपल्या पंचायत कार्यक्षेत्रातील सर्व मद्यालये, मासळी विक्रेते, चिकन सेंटर, मटण सेंटर, चायनिज स्टॉल्स व फास्ट फूडवाल्यांना आपली आस्थापने बंद ठेवण्याचे निर्देश दिलेत. जर कुणी या आदेशाचे उल्लंघन केल्यास संबंधितांवर कडक कारवाई केली जाईल, असे जाहीर नोटीसद्वारे सूचित करण्यात आले आहे.

त्याचप्रमाणे, रामलल्लांच्या प्राणप्रतिष्ठापना सोहळ्यात सहभागी होण्यासाठी येथील शांतादुर्गा मंदिरात आयोजित कार्यक्रमात सहभागी होण्याचे आवाहन पंचायतीने केले आहे.

माशेल, कुंभारजुवे, खांडोळा, तोरसे, मये, पिर्ण, कुडणे, अस्नोडा येथील पंचायत मंडळांनीही तसा निर्णय घेऊन गावात नोटीस जारी केली आहे.