मडगाव: दुचाकी चोरीच्या संशयावरून एका अनोळखी तरुणाला जमावाने बेदम मारहाण केल्याने त्याचा मृत्यू झाल्याची खळबळजनक घटना नुवे येथे घडली. याप्रकरणी मायणा- कुडतरी पोलिसांनी खुनाचा गुन्हा दाखल करून तिघांना अटक केली आहे.

ग्रेसन फर्नांडिस (वय २८ वर्षे), डॉम्निक फर्नांडिस (वय ५२ वर्षे) आणि फ्रान्सिस डायस (वय ४३ वर्षे) अशी त्यांची नावे आहेत. ऍशली फर्नांडिस आणि हेन्री फर्नांडिस या दोघांचा शोध पोलिस घेत आहेत. पोलिस अधीक्षक टिकमसिंग वर्मा यांनी दिलेल्या माहितीनुसार, २७ ऑगस्ट रोजी सायंकाळी ७ ते रात्री १० या कालावधीत सुरावली येथून एक बुलेट चोरीला गेली होती. ही बुलेट ग्रेसन फर्नांडिस यांच्या मालकीची आहे.

या दुचाकी चोरीच्या संशयावरून नुवे येथे काहीजणांनी एका ३० वर्षीय अनोळखी तरुणाला अडविले. जमावाने त्याला लाथा-बुक्क्यांनी बेदम मारहाण केली. यात गंभीर जखमी झाल्याने त्या युवकाला दक्षिण गोवा जिल्हा इस्पितळात दाखल केले. मात्र, इस्पितळात पोहोचताच डॉक्टरांनी त्याला मृत घोषित केले. मृत तरुणाची ओळख पटविण्याचे काम सुरू आहे.

घटनेची माहिती मिळताच मायणा-कुडतरी पोलिसांनी तपासाची चक्रे वेगाने फिरवून तीन संशयितांना अटक केली. चोरीला गेलेली दुचाकीही पोलिसांनी जप्त केली आहे. याप्रकरणी भारतीय न्याय संहिता, २०२३ मधील कलम १०३(१),१८९(२), १८९(३) आणि १९० अंतर्गत गुन्हा नोंदविला आहे. पोलिस निरीक्षक कपिल नायक यांच्या मार्गदर्शनाखाली उपनिरीक्षक नारायण पिंगे पुढील तपास करत आहेत.

या घटनेच्या पार्श्वभूमीवर पोलिसांनी नागरिकांना कायदा हातात न घेण्याचे आवाहन केले आहे. कोणत्याही व्यक्तीवर चोरी किंवा अन्य गुन्ह्याचा संशय असल्यास स्वतःहून मारहाण न करता संबंधित व्यक्तीला पोलिसांच्या ताब्यात द्यावे. संशयिताबाबत तातडीने माहिती देण्यासाठी नागरिकांनी ११२ या हेल्पलाईन क्रमांकावर संपर्क साधावा, असे आवाहन पोलिस अधीक्षक टिकमसिंग वर्मा यांनी स्पष्ट केले आहे.