पणजी : चार्टर्ड अकाऊंटंट यांच्या समितीने दिलेल्या माहितीच्या आधारे राज्यातील खाण लीजधारकांना 300 कोटींच्या नोटिसा बजावल्या असून त्यापैकी 120 कोटी रुपये वसूल केले असल्याची माहिती मुख्यमंत्री डॉ. प्रमोद सावंत यांनी आज पत्रकारांना दिली.

खाणींच्या संदर्भात मुख्यमंत्र्यांनी आज खाण संचालक विवेक एच.पी., ॲडव्होकेट जनरल देविदास पांगम, मुख्य सचिव पुनितकुमार गोयल आणि खाण खात्यातील वरिष्ठ अधिकाऱ्यांची बैठक घेऊन विविध विषयांवर सविस्तर चर्चा केली. यावेळी मुख्यमंत्री म्हणाले, चार्टर्ड अकाऊंटंट समितीने दिलेल्या अहवालानुसार 1 हजार कोटी रुपयांपर्यंतचा महसुलामध्ये तफावत आहे. याबाबत सखोल चौकशी करून लीजधारकांना 300 कोटीपर्यंतच्या नोटीस बजावल्या आहेत. यातील 120 कोटी रुपये सरकारने वसूूल केले आहेत, तर 180 कोटी रुपयांसाठी खाण लीजधारकांनी उच्च न्यायालयात आव्हान दिले आहे. लवकरच हे पैसेही वसूल होतील. ‘कॅग’च्या रिपोर्टवर अहवाल बनवण्याचे काम सुरू आहे.

खाणींबाबतचे सर्व व्यवहार जलदगतीने

सर्वोच्च न्यायालयाच्या आदेशानुसार सर्व खाणी सरकारच्या ताब्यात आल्या असून सर्व व्यवहार जलदगतीने केले जातील. दोन ते तीन महिन्यांत खाणींचे ब्लॉक करून लिलाव करण्यात येईल. यासाठी स्टेट बँक ऑफ इंडियाला लिलाव प्रक्रियेत सामील केले आहे, असे सावंत यांनी स्पष्ट केले.

खंदकांची देखभाल करणार : पावसाळा सुरू झाला असून खंदकांमध्ये पाणी मोठ्या प्रमाणात साचले आहे. त्यामुळे सर्व खंदकांवर देखरेख करण्यासाठी कर्मचाऱ्यांची नेमणूक केली असून सर्व खंदकांची काळजी घेतली जात आहे. खंदकांमधून पाणी उपसा सुरू असल्याचेही मुख्यमंत्री यावेळी म्हणाले.