पणजी : उत्तर व दक्षिण गोवा या दोन्ही जिल्हा पंचायतींच्या पंचवार्षिक निवडणुकीची आचारसंहिता अखेर लागू झाली आहे. राज्य निवडणूक आयोगाने निवडणुकीचा कार्यक्रम शनिवारी जाहीर केला. २० डिसेंबर रोजी रोजी मतदान होणार असून २२ रोजी जिल्हा पंचायतीवर कोणत्या पक्षाची सत्ता असेल, हे स्पष्ट होईल.

आरक्षणाच्या मुद्द्यावरून ही निवडणूक आणखी लांबणीवर पडणार की काय, याबाबतही चर्चा सुरू झाली होती. राज्य निवडणूक आयुक्त मिनिनो डिसोझा यांनी शनिवारी पत्रकार परिषद घेत आदर्श आचारसंहिता लागू झाल्याचे जाहीर केले. त्यांनी या निवडणुकीचा कार्यक्रम जाहीर करताना सांगितले की, उत्तर व दक्षिण गोवा जिल्हा पंचायतींच्या प्रत्येकी २५ जागांसाठी २० डिसेंबर रोजी मतदान होणार आहे, तर २२ रोजी मतमोजणी होईल.

अशी असेल निवडणूक संहिता!

१. उमेदवारी अर्ज सादर करण्यासाठी १ डिसेंबरपासून सुरुवात होईल आणि ९ डिसेंबर ही अर्ज दाखल करण्याची शेवटची तारीख राहणार आहे. परंतु या काळात ३ डिसेंबर रोजी जुने गोवे येथील सेंट फ्रान्सिस झेवियर फेस्त आणि ७ डिसेंबर रोजी रविवार असल्याने सरकारी सुटी आहे. त्यामुळे दोन दिवस वगळता उर्वरित सात दिवसांत उमेदवारांना अर्ज दाखल करता येणार आहेत.

२. उमेदवारी अर्जांची छाननी १० डिसेंबर रोजी होणार आहे आणि ११ डिसेंबर रोजी उमेदवार आपला अर्ज मागे घेऊ शकणार आहे. या निवडणुकीत एकूण ८,६८,६३७ मतदार मतदान करण्यास पात्र असल्याचे त्यांनी जाहीर केले.

३. या निवडणुका पक्षीय पातळीवर होणार असल्या तरी अपक्ष म्हणूनही उमेदवारांना निवडणूक लढवण्याची मुभा आहे. राज्यात एकूण १,२८४ मतदान केंद्रे असणार आहेत.

महिला मतदारांची संख्या अधिक

दोन्ही जिल्हा पंचायतींत एकूण ९ लाख ६८ हजार ८३७ मतदार आहेत. महत्त्वाची बाब, म्हणजे दोन्ही जिल्ह्यांत महिला मतदारांची संख्या अधिक आहे. उत्तर गोवा जिल्हा पंचायतीत एकूण ४ लाख ३९ हजार ४८० नोंदणीकृत मतदार आहेत, ज्यात २ लाख १३ हजार ५२९ पुरुष, तर २ लाख २५ हजार ९४८ महिला मतदार आहेत. यावरून असे दिसते की १२ हजार ४१९ महिला मतदार अधिक आहेत. याशिवाय ३ मतदार ‘इतर'' श्रेणीत आहेत. दक्षिण गोवा जिल्हा पंचायतीसाठी ४ लाख २९ हजार १५७ नोंदणीकृत मतदार असून ज्यात २ लाख ६ हजार ९०२ पुरुष, तर २ लाख २२ हजार २५३ महिला मतदार नोंदणीकृत आहेत, म्हणजेच १५ हजार ३५१ महिला मतदार अधिक आहेत. याशिवाय २ मतदार ‘इतर'' श्रेणीत आहेत.

मतदान मतपत्रिकेद्वारे !

२०२० च्या निवडणुकीत मतदान मतपत्रिकेद्वारे घेण्यात आले होते. तीच पद्धत याही निवडणुकीत आयोगाने कायम ठेवली आहे. या निवडणुकीत ५० जागांंपैकी ३२ जागा जिंकल्या होत्या. यात भाजपच्या सांकवाळच्या उमेदवार अनिता थोरात या बिनविरोध निवडून आल्या होत्या, त्यामुळे ४८ मतदारसंघात मतदान प्रक्रिया पार पडली होती. तर नावेली मतदारसंघातील उमेदवाराच्या अचानक मृत्यूमुळे येथील निवडणूक पुढे ढकलण्यात आली होती. त्यावेळी सात अपक्ष निवडून आले होते, काँग्रेसला चार जागांवर, मगोपला ३ आणि राष्ट्रवादी काँग्रेस व आम आदमी पक्षाला प्रत्येकी एक जागा मिळाली होती.

पाच लाखांचा खर्च!

या निवडणुकीत उमेदवारास जास्तीत जास्त ५ लाख रुपये खर्च करण्याची परवानगी निवडणूक आयोगाने दिली आहे. आदर्श आचारसंहिता आजपासून तात्काळ लागू होत आहे. सर्व नगरपालिका क्षेत्रे आणि पणजी शहर महानगरपालिकेच्या अधिकारक्षेत्रातील क्षेत्र वगळता, उत्तर गोवा जिल्हा पंचायत आणि दक्षिण गोवा जिल्हा पंचायतीच्या अधिकारक्षेत्रातील सर्व भागांत ती लागू असेल, असे डिसोझा यांनी सांगितले.

भाजपची पहिली यादी होणार जाहीर

जिल्‍हा पंचायत निवडणुकीतील भाजप उमेदवारांची पहिली यादी रविवारी जाहीर करण्‍यात येईल. सत्तेत सहभागी असलेल्‍या मगो पक्षाचे तीन मतदारसंघांत उमेदवार असतील. जनतेला दिलेल्‍या शब्‍दानुसार भाजपने या निवडणुकीत ८० टक्‍के नव्‍या चेहऱ्यांना संधी दिली आहे, असे प्रदेशाध्‍यक्ष दामू नाईक यांनी शनिवारी ‘गोमन्‍तक’शी बोलताना स्‍पष्‍ट केले.

राज्‍य निवडणूक आयोगाने शनिवारपासून जिल्‍हा पंचायत निवडणुकीची आचारसंहिता जारी केल्‍यानंतर भाजपच्‍या कोअर समितीची सायंकाळी मुख्‍यालयात बैठक पार पडली. सुमारे दोन तास चाललेल्‍या बैठकीत जिल्‍हा पंचायत निवडणुकीच्‍याच अनुषंगाने चर्चा करण्‍यात आली.