पणजी: अल्पवयीन असताना लैंगिक अत्याचाराला बळी पडलेल्या पीडितेच्या कुटुंबाची आर्थिक परिस्थिती पाहता गोवा भरपाई योजना व गोवा पीडित भरपाई (दुरुस्ती) योजनेखाली तिला २ लाख रुपयांचे आर्थिक साहाय्य आदेश पोक्सो न्यायालयाने उत्तर गोवा जिल्हाधिकाऱ्यांना दिला आहे. हा आदेश मिळाल्यापासून ३० दिवसांत त्याची अंमलबजावणी करावी व या आदेशाची माहिती तपास अधिकाऱ्यांनी पीडितेला द्यावी असे आदेशात नमूद करण्यात आले आहे.

दक्षिण गोव्यातील एका तरुणीचे ती अल्पवयीन असताना लैंगिक अत्याचार संशयिताकडून झाले होते. याप्रकरणाची तक्रार पोलिसांत दाखल झाली होती. या घटनेमुळे तिच्या मानसिक व शारीरिक संतुलन ढळले आहे तसेच ती आपले शिक्षण पूर्ण करू शकली नाही. आर्थिक स्थिती बिकट असून ती बेरोजगार आहे. त्यामुळे कायद्यानुसार पीडितेला आर्थिक सहाय्य देण्याची तरतूद असल्याने ती दिली जावी, मागणी केली होती.

संशयिताने केलेला गुन्हा गंभीर स्वरूपाचा आहे. कायद्यात अशा प्रकरणात पीडितेला आर्थिक साहाय्य देण्याची तरतूद आहे त्यामुळे अर्जदार त्यासाठी पात्र आहे असे निरीक्षण न्यायालयाने केले आहे. बांबोळी येथील गोमेकॉच्या पीडित साहाय्य विभागाने ही मदत मिळण्यासाठी तिला मदत करावी असे आदेशात म्हटले आहे.