सत्तरी तालुक्यात सध्या मुसळधार पाऊस कोसळत आहे. तरीही लोकांना पिण्याचे पाणी वेळेत मिळत नसल्याच्या तक्रारी येत आहेत. सत्तरी तालुक्यातील झर्मे गावात गेल्या सहा-सात दिवसांपासून पिण्याचे पाणी सुरळीतपणे मिळालेले नाही आणि पाणीपुरवठ्यातही लपंडाव सुरू झालेला आहे. त्यामुळे झर्मे गावातील काही लोकांना त्रास सहन करावा लागतो आहे.

नागरिकांनी दिलेल्या माहितीनुसार, झर्मे गावात पाणीपुरवठा विभागाची मोठी टाकी बांधलेली आहे. या टाकीत वाळपई-दाबोस जलशुद्धीकरण प्रकल्पातील पाणी टँकरद्वारे नेऊन सोडले जाते. या टाकीतून नंतर पंपाद्वारे लोकांना पाणीपुरवठा केला जातो; पण गेल्या सहा-सात दिवसांपासून काही लोकांना पिण्याचे पाणी मिळालेले नाही.

प्रसंगी आता लोकांवर पावसाच्या पाण्याचा वापर करण्याची वेळ आलेली आहे. घराच्या छपरावरून ओझरत असलेले पावसाचे पाणी वापरून घरातील भांडी घासण्याची कामे केली जात आहेत. आज सोमवारी काही लोकांवर छपरावरून पडणारे पावसाचे पाणी वापरून तोंडही धुण्याची वेळ आली.

कर्मचारी वर्गाचे दुर्लक्ष

टँकरने पाणी टाकीत सोडले जाते. नंतर मात्र सुरळीत पाणीपुरवठा करण्याकडे लक्ष दिले जात नाही, असे लोकांचे म्हणणे आहे. कर्मचारी वर्गाने सातत्याने लक्ष ठेवून पाणीपुरवठा करण्यास कार्यरत राहण्याची गरज आहे, अशी लोकांची मागणी आहे.

जलवाहिन्या कोरड्याच

झर्मे गावात लोकांना सुरळीत पाणीपुरवठ्यावर सरकारने लक्ष देऊन समस्या सोडविण्यासाठी प्रयत्न केले पाहिजेत. बाहेर धो-धो पाऊस पडत असूनही काही ठिकाणी जलवाहिनी मात्र कोरड्या असतात‌‌. गावात पाण्याची टाकी असूनही लोकांना दर दिवशी नियमितपणे पाणी मिळत नाही ही गंभीर बाब आहे, असे नागरिक कल्पेश गावस यांनी सांगितले.