पणजी : दोनापावलस्थित राष्ट्रीय समुद्रविज्ञान संस्थेच्या (एनआयओ) १३ विद्यार्थ्यांची सकाळी मिरामार समुद्रकिनाऱ्याजवळ अडचणीत सापडलेल्या मासेमारी नौकेतून ‘दृष्टी’च्या जीवरक्षकांनी सुखरूप सुटका केली. समुद्रातील वाळूच्या पट्ट्यावर नौका अडकल्याने हा प्रकार घडला.

मिळालेल्या माहितीनुसार, मिरामार किनाऱ्यापासून सुमारे २०० मीटर अंतरावर असलेली मासेमारी नौका वाळूच्या सांड्यावर अडकली. यावेळी नौकेत ‘एनआयओ’चे १३ विद्यार्थी होते. यात नऊ विद्यार्थिनी आणि चार विद्यार्थी असून ते सागरी अभ्यास दौऱ्यावर होते.

घटनेची माहिती मिळताच तत्काळ जीवरक्षकांनी बचावकार्य हाती घेतले. नुकत्याच कार्यान्वित केलेल्या ‘सीहॉर्स’ या तात्पुरत्या तरंगत्या प्लॅटफॉर्मच्या मदतीने ही सुटका केली. या आधुनिक व्यवस्थेमुळे जलआकस्मिक परिस्थितींमध्ये प्रतिसाद देण्याचा वेळ लक्षणीयरीत्या कमी झाल्याचे स्पष्ट झाले आहे.

बचावकार्य यशस्वीरीत्या पार पडून सर्व १३ विद्यार्थ्यांना सुरक्षितपणे किनाऱ्यावर आणले. सुदैवाने या घटनेत कोणतीही जीवितहानी किंवा दुखापत झाली नसल्याचे अधिकाऱ्यांनी सांगितले.