फोंडा : राज्यातील ओबीसी महासंघातर्फे येत्या २५ रोजी बी. पी. मंडल यांच्या स्मरणार्थ पर्वरी येथील शिवतेज सभागृहात १०६ वी जयंती कार्यक्रम आयोजित करण्यात आला असून या कार्यक्रमाला मुख्यमंत्र्यांसमवेत इतर मंत्रीही उपस्थिती लावणार आहेत.

त्यापूर्वी येत्या ७ तारखेला अमृतसर - पंजाब येथे ओबीसी महासंघाचे नववे राष्ट्रीय अधिवेशन होणार असून या अधिवेशनाला गोव्यातील ओबीसी बांधव आपले प्रतिनिधीत्व दर्शवणार असल्याची माहिती ओबीसी महासंघाचे गोवा अध्यक्ष मधू नाईक यांनी फोंड्यातील पत्रकार परिषदेत दिली.

यावेळी ओबीसी महासंघाचे पदाधिकारी दामोदर नाडर, प्रशांत माईणकर व प्रेमानंद शेट आदी उपस्थित होते. ओबीसी महासंघाच्या अनेक मागण्यांवर या अधिवेशनात चर्चा करून निर्णय घेण्यात येणार आहे. या अधिवेशनाला गोवा राज्याचे जलस्त्रोतमंत्री सुभाष शिरोडकर यांची खास उपस्थिती असेल.

ओबीसी महासंघाशी संबंधित सर्व समाजानी एकसंध होऊन ओबीसी चळवळ यशस्वी करावी, असे आवाहन मधू नाईक यांनी केले. यावेळी दामोदर नाडर, प्रशांत माईणकर व प्रेमानंद शेट यांनीही आपले विचार व्यक्त करताना ओबीसी महासंघाच्या वर्धापनदिनाला मोठी उपस्थिती असेल, अशी ग्वाही दिली.