Goa Drug Case

शिक्षणासाठी भारतात आलेल्या नायजेरीयन तरुणीला गोवा पोलिसांनी वेगळ्याच कारणासाठी अटक केली आहे. म्हापसा पोलिसांनी मंगळवार (दि.14 मे) बसस्थानकावर अमली पदार्थ विरोधी ही कारवाई केली.

गोव्यात तस्करी होत असलेल्या अमली पदार्थ प्रकरणात ही महत्वाची लिंक असल्याचे उत्तर गोवा पोलिस अधीक्षक अक्षत कौशल यांनी सांगितले.

फेथ शिमेरी (24, नायजेरीया) असे अटक करण्यात आलेल्या तरुणीचे नाव आहे.

अटक करण्यात आलेली तरूणी विद्यार्थी व्हिसावर भारतात शिक्षण घेण्यासाठी आली आहे. लखनौ विद्यापीठात तिने शिक्षणासाठी तिने व्हिसा मागितला होता, त्यानंतर भारताकडून व्हिसा मिळाला. पण, तिने लखनौ विद्यापीठात प्रवेशच घेतला नसल्याची माहिती अक्षत कौशल यांनी दिली.

फेथ शिमेरी काही दिवस दिल्ली राहत होती, त्यानंतर ती बंगळुरु येथे कामासाठी गेली. तिथून अमली पदार्थ घेऊन आली असता तिला अटक करण्यात आल्याचे कैशल म्हणाले.

राज्यातील अमली पदार्थ तस्करीवर नियंत्रण मिळविण्यासाठी पोलिस काम करत असल्याची माहिती कौशल यांनी दिली. गेल्या काही दिवसांपूर्वी फोंडा येथे वीड निर्मिती करणाऱ्या एका प्रयोगशाळेवर कारवाई करण्यात आली.

गोव्याला अमली पदार्थ तस्करीपासून मुक्त करण्यासाठी पोलिस प्रयत्नशील असल्याचे देखील अक्षत कौशल यावेळी म्हणाले.